Байден Россиядан нефть, газ ва кўмир импортини буткул тақиқлади

Унинг сўзларига кўра, бу қадам америкаликларнинг Путин режимига яна бир кучли зарба берганини англатади.

«Биз Путиннинг урушини субсидиялашда иштирок этмаймиз», дея қўшимча қилган Байден.

Ўз баёнотида Байден бу қарорни АҚШ иттифоқчилар билан маслаҳатлашиб қабул қилганини, АҚШ Европадаги иттифоқчиларнинг Россиядан энергия ресурслари импортига нисбатан тақиқларга қўшила олмаслигини яхши тушунишини билдирган.

Байден америкаликларни ушбу тақиқ туфайли мамлакатда бензин ва газ нархи ошиши мумкинлиги ҳақида огоҳлантирган.

У Украинадаги уруш нефть компанияларининг нарх-навони ошириши учун баҳона бўлмаслиги ҳақида гапирган.

АҚШ маълум тўлов қилиши, аммо бу эркинлик учун тўлов бўлиши таъкидланган.

Байденнинг сўзларига кўра, президент Путин «нима қилиб бўлса ҳам ўз қонли йўлини давом эттиришга қарор қилган». Байден Путин ҳеч қачон Украинада ғалаба қозона олмаслигига ваъда берди.

«Украина ҳеч қачон Путин томонидан забт этилмайди. У бир шаҳарни эгаллаши мумкин, аммо у бутун мамлакатни эгаллай олмайди», деди Америка президенти. 

У АҚШ Конгрессини Украинани қўллаб-қувватлаш учун 12 млрд долларлик ёрдам пакетини қабул қилишга чақирди.

Энергия ресурслари нархи ошиши хавфи мавжуд эканига қарамай, бу қарорни Американинг икки етакчи партияси ҳам қўллаб-қувватлаган.

Шундай қарор қабул қилингани ва тез орада расман эълон қилиниши ҳақидаги хабарлар ортидан нефть нархи оша бошлади. Brent маркасидаги нефть нархи 5 фоиздан кўпроққа ошиб, бир баррели 130 долларга етди.

Қайд этиш керакки, Россия нефти ва газига кўпроқ боғланиб қолган Европа мамлакатлари билан солиштирганда АҚШнинг бу ҳаракати шошилинч амалга оширилди.

Аввалроқ Канада Россия нефти импортига тақиқ ўрнатилганини эълон қилганди.

Британия ва ЕИ

Буюк Британия ҳукумати ҳам 2022 йил охирига қадар Россия нефти ва нефт маҳсулотлари импортидан босқичма-босқич воз кечилишини маълум қилган.

Ўтиш даври бозор ва бизнесга янги реалликка мослашиш ҳамда Россия нефтига муқобил вариант топиш учун керак бўлади.

ЕИ Россия энергия ресурсларига қарамликни чеклаш бўйича қадамлар қабул қилган, унга кўра йил охиригача Россиядан импортга талаб учдан икки қисмга қисқаради.

Британия Европанинг бошқа кўплаб мамлакатларига қараганда Россия энергия ресурсларига камроқ қарам. Шунга қарамай, Россия етказиб берувчи нефть ҳажми Бирлашган Қироллик истеъмолининг 8 фоизини, дизел ёнилғиси эса 18 фоизини ташкил этади.

Германия ТИВ раҳбари Анналена Бербок айни вақтда Россиядан нефть импорт қилишни тўхтатиш - мамлакат транспортини тўхтатиб қўйишини маълум қилди.