Навоийда радиоактив модда сотмоқчи бўлган шахсларга жиноят иши қўзғатилди

Улар 250 гр радиоактив моддани 50 минг АҚШ долларига пулламоқчи бўлишган.

Фото: ИИВ

ИИВ ЖҚББ Коррупция ва иқтисодий жиноятларга қарши курашиш бошқармасининг маълум қилишича, 2022 йилнинг 4 март куни Навоий вилояти ИИБга фуқаро ариза билан мурожаат қилиб, Навбаҳор туманида яшовчи икки нафар шахс ноқонуний равишда «Радий» моддасини 50,000 АҚШ долларига сотмоқчи эканлигини маълум қилган.

5 март куни вилоят ИИБ ЖҚБ Коррупция ва иқтисодий жиноятларга қарши курашиш бўлими, ДХХ Навоий вилояти бошқармаси ҳамда Навбаҳор тумани ИИБ ходимлари ҳамкорлигида тезкор рейд ўтказилган. Тадбир жараёнида туманнинг Қалқонота маҳалласи ҳудудида икки нафар шахс 1 дона шиша идишга жойлаштирилган «Radiy Rа 226 02 5» ёзувли 250 гр радиоактив моддани махсус харидорга 50 минг долларга сотаётган вақтида ушланган.

Ҳолат юзасидан Жиноят кодексининг 252-моддаси 2-қисми «б» банди билан жиноят иши қўзғатилиб, гумонланувчилар белгиланган тартибда ушланган. Ҳозирда тергов ҳаракатлари олиб борилмоқда.

Навоийда портловчи моддалар савдоси билан шуғулланган кончилар узоқ муддатга қамалди