АҚШ Европага суюлтирилган газ етказиб беришни кўпайтиради

Қайд этилишича, АҚШ ҳозирда суюлтирилган газнинг асосий экспортчиси ҳисобланади.

Фото: Reuters

АҚШ Европа мамлакатларига суюлтирилган газ экспортини оширади. Бу ҳақда АҚШ энергетика вазирлиги маълум қилди.

Хабар қилинишича, вазирлик Мексика кўрфазидаги терминаллардан суюлтирилган газни АҚШ билан эркин савдо тўғрисида шартнома тузмаган мамлакатлар, Европанинг барча давлатларига қўшимча ҳажмда экспорт қилишга рухсат берган.

Мазкур рухсат Cheniere Energy компаниясига Sabine Pass ва Corpus Christi терминалларидан кунига 20,4 млн куб метр суюлтирилган газни экспорт қилиш имконини беради.

Илгари бу терминаллардан эркин савдо тўғрисида шартнома имзолаган давлатлар, хусусан, Канада, Мексика, Австралия, Осиёнинг қатор мамлакатлари, Яқин Шарқ, Марказий ва Жанубий Америкага экспорт қилиш мумкин эди.

Хабарда қайд этилишича, АҚШ ҳозирда суюлтирилган газнинг асосий экспортчиси ҳисобланади ва йил охирига бориб экспорт ҳажми яна 20 фоизга ошиши кутилмоқда.