Миллий гвардияга бир қатор янги ваколатлар берилмоқда

Ўзбекистон Миллий гвардиясига бир қатор ваколатлар берилмоқда. Бу ҳақда Қонунчилик палатаси депутати Расул Кушербаев хабар қилди.

Фото: Kun.uz

Қайд этилишича, Миллий гвардия органлари Маъмурий жавобгарлик тўғрисидаги кодекснинг қатор моддалари бўйича ҳуқуқбузарликлар тўғрисидаги ишларни кўриб чиқишга ва жарима тариқасидаги маъмурий жазо чораларини қўллашга ҳақли эканлиги белгиланмоқда.

Ушбу моддалар:

187-моддасининг биринчи қисми (Жамоат жойларида алкоголь маҳсулотини истеъмол қилиш);

188-модда (Вояга етмаган шахсни ғайриижтимоий хатти-ҳаракатларга жалб қилиш);

188-2-модда (Вояга етмаган шахснинг кўнгил очиш (дам олиш) жойларида тунги вақтда бўлишига йўл қўйиш);

192-модда (Маиший шовқинга қарши кураш талабларини бузиш) бўйича.

Миллий гвардия органлари мансабдор шахслари Маъмурий жавобгарлик тўғрисидаги кодекснинг 61-, 183-, 184-2-, 184-3-, 185-, 185-1- (божхона тўғрисидаги қонунчиликни бузиш билан боғлиқ ҳуқуқбузарликлардан ташқари) 185-2-, 185-3-, 186-моддаларида, 187-модданинг иккинчи қисмида, 188-1-, 188-3-, 189-, 189-1-, 190-, 191-, 194-1-, 195-1-, 196- (Миллий гвардияга тегишли қисми бўйича) ва 210-1- моддаларида назарда тутилган маъмурий ҳуқуқбузарликларни аниқлаган тақдирда, маъмурий ҳуқуқбузарлик тўғрисида баённома тузиши ва белгиланган тартибда судга кўриб чиқиш учун юбориши белгиланмоқда.

Лойиҳа депутатлар томонидан биринчи ўқишда қабул қилингани айтилади.