Озарбойжонда мажбурий ниқоб тақиш режими бекор қилинади

Халқаро аэропорт ва таълим муассасаларида тиббий ниқоб тақиш мажбурий бўлмайди, аммо тавсия қилинади.

Фото: Getty Images

Озарбойжонда 1 майдан бошлаб коронавирус пандемияси туфайли жорий этилган мажбурий ниқоб тақиш режими бекор қилинади.

"2022 йил 1 майдан бошлаб 2022 йил 1 июлгача узайтирилган махсус карантин режими шароитларида шахсий ҳимоя воситаларидан (тиббий ниқоблар) фойдаланиш талаби бекор қилинади", — дейилади мамлакат вазирлар маҳкамаси хабарида.

Қайд этилишича, халқаро аэропорт ва таълим муассасаларида тиббий ниқоб тақиш мажбурий бўлмайди, аммо тавсия қилинади.

Ҳозирда Озарбойжонга кириш учун эмланганлик тўғрисидаги сертификат талаб қилинади. Бу қоида 18 ёшгача бўлганларга тааллуқли эмас. Мамлакатда 15 апрелдан чегарадан ўтишда ПЗР-тест топшириш талаби бекор қилинган.