Ўзбекистоннинг тўрт шаҳрида инновацион технопарк ташкил этилади

Вазирлар Маҳкамасининг “Инновацион ривожланиш вазирлиги ҳузуридаги инновацион ўқув-ишлаб чиқариш технопарклари фаолиятини ташкил этиш тўғрисида”ги қарори лойиҳаси эълон қилинди.

Тошкент шаҳрида барпо этилган “INNO” инновацион ўқув-ишлаб чиқариш технопарки Наманган, Бухоро, Жиззах ва Нукус шаҳарларида 2023-2026 йилларда босқичма-босқич ташкил этилади. Бунда, 8 та стартап-акселератор, 4 та бизнес-инкубатор, 4 та ишлаб чиқариш майдонлари, 12 та коворкинг марказлари фаолияти йўлга қўйилади.

Ташкил этиладиган Технопарклар маҳаллий бюджет ҳамда Ўзбекистон ижтимоий ва ишлаб чиқариш инфратузилмасини ривожлантириш дастури маблағлари ҳисобидан молиялаштирилади.

Белгиланишича:

• технопарклар резидентлари инновацион маҳсулотлар ишлаб чиқаришни ривожлантириш учун энг қулай шароитларни яратиш мақсадида Ўзбекистон ҳудуди доирасида экстерриториаллик принципи асосида жойлаштирилади;
• технопаркларни қурилиш ва жиҳозлаш харажатлари 90 фоизи Ўзбекистон ижтимоий ва ишлаб чиқариш инфратузилмасини ривожлантириш дастури, 10 фоизи Қорақалпоғистон республика бюджети ва тегишли вилоятлар маҳаллий бюджетининг маблағлари ҳисобидан қопланади;
• технопаркларга ҳар йили “Бўлажак олим” танлови доирасида ажратиладиган маблағларнинг 30 фоиздан кам бўлмаган миқдори стартап лойиҳаларни эълон қилиш, кўриб чиқиш, танлаб олиш ва муваффақиятли лойиҳаларни молиялаштириш учун йўналтирилади.