Байден Украинага қўшимча ҳарбий ёрдам юборилишини маъқуллади 

АҚШ президенти Жо Байден 6 май, жума куни Украинага қўшимча ҳарбий ёрдам ажратилишини эълон қилди. Reuters хабарига кўра, Оқ уй томонидан тасдиқланган қурол-яроғлар янги пакети 150 миллион долларни ташкил қилади. У артиллерия ўқ-дорилари, радарлар ва бошқа жиҳозларни ўз ичига олади.

«Бугунги эълон билан менинг маъмуриятим Украинага хавфсизлик бўйича ёрдам жўнатиш учун ишлатилиши мумкин бўлган маблағни деярли тугатди», дейилади Байденнинг баёнотида. Бугунги эълондан олдин Оқ уй 250 миллион доллар қолгани ҳақида хабар берган эди. Америка президенти яна Конгрессни Украинага ёрдамни 3 миллиард доллардан 33 миллиард долларга оширишни маъқуллашга чақирди. Қўшма Штатлар Киевга қўшимча артиллерия, зирҳли техника, танкка қарши ва зенит тизимлар, шунингдек, инсонпарварлик ёрдами жўнатишни режалаштирмоқда, деб қайд этади CNN.

Россиянинг Украинада ҳарбий ҳаракатлари бошланганидан бери АҚШ Киевга 3,4 миллиард долларлик қурол-яроғ, жумладан гаубицалар, Stinger зенит тизимлари, танкка қарши Javelin ракеталари, ўқ-дорилар ва Ghost дронларини топширди. Бугун тасдиқланган янги ҳарбий ёрдам пакетига 25 минг дона 155 миллиметрли артиллерия снарядлари, артиллерияга қарши радарлар, рақибга нотўғри маълумот бериш ускуналари, дала жиҳозлари ва эҳтиёт қисмлар киради, дея хабар берди Reuters ўз манбасига таяниб. 

Апрель ойи охирида, 28 апрель куни АҚШ Конгресси Вакиллар палатаси иккинчи жаҳон урушидан бери қўлланилмаган ленд-лиза дастури бўйича Украинага қурол етказиб бериш тўғрисидаги қонун лойиҳасини кўпчилик овоз билан маъқуллади. Байден уни 9 май куни имзолашни режалаштирмоқда, деб хабар берди Оқ уй. Шундан сўнг, АҚШ бюрократик тартиб-қоидалардан кечиб, икки йил ичида Киевга қурол ва бошқа ёрдамларни тезроқ етказиб бера олади. 
 
«Молиявий ёрдам кўлами сезиларли даражада ошди, бу узоқ муддатли ва муҳим қурол-яроғ етказиб бериш учун асос яратилганлигини англатади, бунда қисқа муддатли ечимлардан кўра кўпроқ узоқ муддатли сценарийлар кўриниб турибди», - дея қонун лойиҳасига изоҳ берди Бундесвернинг истеъфодаги полковниги, «Фан ва сиёсат» жамғармаси ҳарбий эксперти Волфганг Рихтер.