Тошкент давлат педагогика университетига академик мустақиллик берилади

“Низомий номидаги Тошкент давлат педагогика университети фаолиятини такомиллаштириш бўйича қўшимча чора-тадбирлар тўғрисида”ги президент қарори қабул қилинди.

Фото: Kun.uz

“Ҳуқуқий ахборот” каналида ёзилишича, 2023 йилдан Низомий номидаги Тошкент давлат педагогика университетига академик, ташкилий ва молиявий мустақиллик берилади.

2024/2025 ўқув йилида тажриба-синов тариқасида Университетнинг педагогика таълим йўналишларига қабул жараёнлари икки босқичда – дастлабки имтиҳон ва кириш тест синовлари орқали амалга оширилади.

Бунда:

дастлабки имтиҳон ва кириш тест синовлари ДТМ томонидан ўтказилади;
дастлабки имтиҳон доирасида абитуриентларнинг педагогик касбга мойиллиги ўрганилади;
кириш тест синовларида қатнашишга фақат дастлабки имтиҳондан муваффақиятли ўтган абитуриентларга рухсат этилади.

2024 йил 1 январга қадар:

университет фаолиятида “Олий таълим жараёнларини бошқариш” ахборот тизими тўлиқ жорий этилади;
университет илмий журнали Scopus, Web of Science ёки бошқа халқаро маълумотлар базаларига киритилади.

2023 йил 1 мартгача умумий ўрта таълим муассасаларидаги илғор ўқитувчилар очиқ дарсларини онлайн платформалар орқали намойиш қилиш ва уларнинг муҳокамасини ташкил этиш амалиёти жорий қилинади.