Техас: ташлаб кетилган фурадан 46 кишининг жасади топилди

Ёнғин хавфсизлиги хизмати вакили хабар қилишича, 16 киши, жумладан тўрт бола шифохонага етказилган. Омон қолганлар иссиқ уриши ва узоқ вақт давомида сувсиз қолишдан азият чеккан.

Америка-Мексика чегарасидан 250 км ичкарида жойлашган Сан-Антонио контрабандачилар транзит маршрутининг асосий пунктларидан саналади. Сан-Антонио Ёнғин хавфсизлиги хизмати бошлиғи Чарльз Ҳуднинг айтишича, қутқарувчилар одам ўлими ҳақидаги хабар келиб тушгач, воқеа жойига маҳаллий вақт билан соат 18:00 атрофида (Тошкент вақти билан ярим тундан оғганда) етиб келишган. Ёнғин хавфсизлиги хизмати ходимлари ёнида жасад ётган трейлерни аниқлашган. Улар эшикни очишганида ичкарида яна кўплаб жасадларни кўришган. Унинг қўшимча қилишича, юк машинасида кондиционер ишламаган ва трейлер ичкарисида сув бўлмаган.

Сан-Антониода ҳозирда ёз иссиқ кечмоқда ва душанба куни ҳарорат 39,4 даражага чиққан.

KSAT телеканали хабарига кўра, автомобил Сан-Антонио шаҳри жануби-ғарбий қисмидаги темирйўл ёқасида топилган. Сан-Антонио полицияси бошлиғи Уильям Макманус тергов федерал агентларга ўтгани, уч киши ҳибсга олинганини маълум қилган.

Мексика ташқи ишлар вазири Марсело Эбрард мамлакат консули воқеа жойига йўл олганини маълум қилган, аммо ҳозирча қурбонлар қайси мамлакат фуқаролари экани тасдиқланмаган. Техаснинг республикачи губернатори Грег Эбботт одамлар ўлимида АҚШ президенти Жо Байденни айблаган ва бу ҳолат унинг «ажалвор очиқ чегаралар сиёсати» натижаси эканини айтган.

Эбботнинг рақиби, Демократик партия номзоди Бето О'Рурк контрабандачилар тармоғини йўқ қилиш учун тезкор ҳаракатларга киришиш ва бунинг ўрнига легал миграция учун имкониятларни кенгайтиришни таклиф этган.

Иммиграция Қўшма Штатларда баҳсли сиёсий масала ҳисобланади, ўтган йилда мамлакат чегарасини Мексика орқали кесиб ўтган рекорд миқдорда нолегал мигрантлар қўлга олинган, уларнинг аксарияти фавқулодда хавфли маршрутларда ҳаракатланишган.