Электр энергетикаси соҳаси регулятори ташкил этилади

Бош вазир ўринбосари Жамшид Қўчқоров 22 июл куни Олий Мажлис Қонунчилик палатасидаги нутқида энергетика соҳасида қилиниши режалаштирилган ишлар ҳақида тўхталиб ўтди.

“Энергетика ва табиий газ соҳасида қилинаётган ишлар ҳақида қисқача ахборот бериб ўтмоқчиман. Бу борадаги ишлар тўхтаётгани йўқ. Биринчидан, “Ўзтрансгаз” АЖнинг газ сотиб олиш ва сотиш функцияларини янги тузилган “UzGasTrade”ташкилотига ўтказдик. Бу ерда кимлардадир бир чўнтак ўрнига иккинчи чўнтак пайдо бўлди, деган савол туғилиши мумкин. Аммо бундай бўлмайди. 2026 ёки 2027 йилга бориб газ соҳасида улгуржи бозорга ўтамиз.

“Ўзтрансгаз”ни газ сотиб олиш ва сотиш функцияларидан озод қилиш унинг молиявий аҳволини барқарорлаштириши керак. Бу эса инфраструктурани яхшилашга имкон беради.

Электр энергетика соҳасида ҳам худди шунга ўхшаш ишни қилмоқчимиз. “Миллий электр тармоқлари” АЖнинг электр энергиясини сотиб олиш ва сотиш функциясидан озод қилиниши режалаштирилмоқда. Газ соҳасида бўлгани каби махсус “Power Trade”(номи ҳали расман тасдиқланмаган) номли ташкилот ташкил қилинади. Бу эса “Миллий электр тармоқлари” АЖни қўшимча функциялардан озод этади.

Электр энергетика соҳасида регулятор тузилиб, энергетика бозори иштирокчилари фаолиятини лицензиялаш ва амалдаги қонунчиликка риоя этилиши назорат қилинади. Таъбир жоиз бўлса, Марказий банк тижорат банклари фаолиятини қандай назорат қилса, ушбу регулятор ҳам бозордаги барча иштирокчиларнинг фаолиятини тартибга солиб туради”, деди Қўчқоров.

Эслатиб ўтамиз, 2023 йилда 14 та туман ва шаҳарда “Ҳудудий электр тармоқлари” АЖга муқобил тарзда, истеъмолчиларга электр энергиясини сотадиган хусусий чакана электр савдо компаниялари ташкил этиш кўзда тутилган.

Kun.uz энергетика соҳасида 2022 йилга мўлжалланган режалар тафсилотини ёритган эди.