Нукус шаҳрида биринчи Оролбўйи форуми ўтказилади

Ўзбекистон ташқи ишлар вазири Владимир Норов Тожикистон ташаббуси билан БМТ Бош ассамблеяси 77-сессияси доирасида Нью-Йорк шаҳрида ташкил этилган "Эриб бораётган криосфера: ерости сувларини сақлаш ва сув ресурсларини бошқариш бўйича таҳдидлар" мавзусидаги юқори даражадаги йиғилишда иштирок этди.

Владимир Норов ўз нутқида Орол муаммосига алоҳида тўхталди. Ўзбекистон раҳбари ташаббуси билан Орол денгизининг қуриган тубида ҳимоя яшил майдонларни яратиш, Оролбўйи минтақасини экологик инновациялар ва технологиялар зонасига айлантириш бўйича амалга оширилаётган чора-тадбирларнинг аниқ натижалари ҳақида хабар берилди.

Иштирокчилар жорий йил Нукус шаҳрида ўтказиладиган Биринчи Оролбўйи форумига таклиф қилинди. Оролбўйи минтақаси учун кўп шериклик траст фонди фаолиятини молиявий қўллаб-қувватлашнинг муҳимлиги ҳам эътироф этилди.