АҚШ давлат котиби ёрдамчиси Ўзбекистонга ташриф буюради

АҚШ давлат котибининг жамоатчилик билан алоқалар ва ахборот сиёсати бўйича ёрдамчиси вазифасини бажарувчи Элизабет Трюдо Ўзбекистонга ташриф буюради.

Фото: Henning Kaiser / dpa

АҚШ ташқи сиёсат идораси матбуот хизмати хабарига кўра, 28 сентябрдан 9 октябргача у Непал, Бирлашган Араб Амирликлари ва Қирғизистонга ҳам ташриф буюради.

Ўзбекистонга ташрифи чоғида Элизабет Трюдо Тошкентдаги Вебстер университетида «Оммавий ахборот воситалари мутахассислари учун инглиз тили» дастурининг битирувчилари билан суҳбатлашади.

Бундан ташқари, у маҳаллий нодавлат нотижорат ташкилотлари вакиллари, АҚШ ҳукумати томонидан молиялаштирилган алмашинув дастурлари битирувчилари билан учрашишни ва Жиззахдаги аёллар шелтерига ташриф буюришни режалаштирмоқда.