Туркия компаниялари Ўзбекистонда қўшма лойиҳаларни амалга оширади

Туркиянинг Кайсери вилоятида Ўзбекистон савдо-иқтисодий, инвестиция ва сайёҳлик салоҳияти тақдим қилинди.

Ўзбекистоннинг Туркиядаги элчихонаси дипломатлари амалий сафар билан ушбу мамлакатнинг Кайсери вилоятида бўлди, деб хабар бермоқда «Дунё».

Вилоят 30 га яқин етакчи саноат компаниялари раҳбарлари иштирокида Ўзбекистон савдо-иқтисодий, инвестиция ва сайёҳлик салоҳиятига бағишланган тақдимот ўтказилди. Шунингдек, Sersim, Boyteks Group, Mundo Group ва Yataş Holding компаниялари билан саноат кооперацияси усули орқали қўшилган қиймат занжирларини яратиш ва Ўзбекистон ҳудудида қўшма лойиҳаларни амалга ошириш истиқболлари атрофлича муҳокама қилинди.

Бўлиб ўтган учрашувлар натижасида Кайсери вилояти туризм агентликлари ҳамда етакчи саноат компаниялари вакилларидан иборат делегация Ўзбекистонга сафарини уюштиришга келишиб олинди.

Кайсери вилояти саноати асосини тўқимачилик, электротехника, мебелсозлик ва машинасозлик жабҳалари ташкил қилади. Вилоятда жами 25 мингдан ортиқ тадбиркорлик субъектлари рўйхатдан ўтган. Ҳудудда 4 та саноат ва эркин иқтисодий зоналар фаолият кўрсатади. 2021 йил якунларига кўра, Туркия ушбу минтақасидан 3,6 миллиард долларга тенг маҳсулот экспорт қилинган.