Салливан: АҚШ Украина позициясини мустаҳкамлаш учун ҳамма нарсани қилади

Қўшма Штатлар Украинанинг жанговар ҳаракатларда қатнашиш учун қуролга эга бўлишини таъминлашга ҳаракат қилишда давом этади. Бу ҳақда АҚШ президентининг миллий хавфсизлик бўйича маслаҳатчиси Жейк Салливан маълум қилди.

Фото: Reuters

«АҚШнинг позицияси ўзгармайди, у олти ой аввалгидек қолмоқда. Биз Украинанинг жанг майдонидаги позициясини мустаҳкамлаш учун қўлимиздан келган ҳамма нарсани қиламиз», деди у президент самолёти бортида журналистларга.

Жейк Салливан президент Жо Байденга АҚШ-АСЕАН ва G20 саммитларига парвозда ҳамроҳлик қиляпти.

Бир кун аввал АҚШ давлат котиби Энтони Блинкен Украинага 400 миллион долларлик янги қуроллар партиясини ажратишга рухсат берганини эълон қилган эди.

У Hawk зенит тизими учун ракеталар, Stinger ракеталари билан жиҳозланган тўртта Avenger зенит-ракета мажмуаси, HIMARS ялпи ўт очиш реактив тизимлари учун қўшимча ўқ-дорилар, 21 мингта 155 миллиметрли артиллерия снарядлари, 500 та юқори аниқликдаги 155 миллиметрли артиллерия снарядлари, совуқ ҳаво учун ускуналар ва бошқа ҳарбий техникани ўз ичига олади.

Пентагон пресс-релизида таъкидланганидек, АҚШнинг Украинага янги ёрдам пакети 2021 йил августидан бери 25-ёрдам пакетидир. Умуман олганда, Байден бошқаруви даври бошланганидан бери Қўшма Штатлар Киевга 19,3 миллиард доллардан ортиқ ҳарбий ёрдам кўрсатган.