НАТО кемалари Атлантика океани ва Ўрта Ер денгизида ҳарбий машқларни бошлади

Машқларда Канада, Дания, Германия, Голландия, Франция, Греция, Италия ва АҚШ ҳарбий денгиз флотининг кўплаб кемалари қатнашмоқда.

Фото: Anadolu Agency

Кўп сонли ҳарбий кемалар, жумладан, НАТО давлатларига тегишли 5 та авиаташувчи кема Атлантика минтақаси ва Ўрта Ер денгизида ҳарбий машғулотларни бошлади.

НАТО баёнотига кўра, ноябрь ойи охиригача давом этадиган машғулотларда АҚШ, Британия, Италия ва Франциянинг самолёт ташувчи кемалари, кўп сонли ҳарбий кемалар ва жанговар самолётлар иштирок этади.

Жумладан, Қўшма Штатлар дунёдаги энг янги ва энг катта ҳарбий кема ҳисобланган USS Gerald R. Ford авиаташувчисини НАТО машғулотларига жўнатган.

Шунингдек, машқларда Американинг USS George HW Bush, Британиянинг HMS Queen Elizabeth, Франциянинг Charles De Gaulle ва Италиянинг Cavour авиаташувчи кемалари ҳам иштирок этмоқда. Уларни Канада, Дания, Германия, Голландия, Франция, Греция, Италия ва АҚШ ҳарбий-денгиз флотининг кўплаб кемалари кузатиб боряпти.

Британиянинг HMS Queen Elizabeth авиаташувчи кемаси бортида F-35 самолётлари билан Атлантика океани шимолига йўл олган.

Франция, Италия ва АҚШ (USS George H.W. Bush) ҳарбий-денгиз флотининг авиаташувчи кемалари Ўрта Ер денгизида ҳаракатланмоқда.