Тадбиркорларнинг энергия ресурсларидан фойдаланиш ҳолати текширилади 

“Куз-қиш мавсумида истеъмолчиларни автобензин маҳсулотлари билан узлуксиз таъминлаш ва улар нархлари кескин ошиши олдини олиш чора-тадбирлари тўғрисида”ги президент қарори қабул қилинди.

2022 йил 10 декабрдан 2023 йил 1 мартгача импорт қилинадиган, маҳаллий корхоналар томонидан ишлаб чиқариладиган ва тадбиркорлар томонидан якуний истеъмолчиларга сотиладиган АИ-80 автобензин учун, истисно тариқасида, акциз солиғи “нол” ставкада қўлланади.

2022 йил 10 декабрдан 2023 йил 1 апрелгача президент ҳузуридаги тадбиркорлар ҳуқуқлари ва қонуний манфаатларини ҳимоя қилиш бўйича вакил билан келишмасдан тадбиркорларни улар молиявий-иқтисодий фаолиятига аралашмаган ҳолда энергия ресурсларидан ноқонуний ва самарасиз фойдаланиш ҳолатлари бўйича текширишга рухсат берилди.

Текширувлар натижалари бўйича автобензин маҳсулотлари ортиқча йўқотишларига ва талон-торожликларга йўл қўйган мансабдор шахсларга қонунчиликда белгиланган жазо чораларини қўллаш, улар фаолиятига ҳуқуқий баҳо бериш юзасидан ҳуқуқни муҳофаза қилувчи органларга тақдимномалар киритилади.