АҚШ Конгресси Вакиллар палатаси 6-марта спикерни сайлай олмади

Республикачилар партияси етакчиси Кевин Маккарти кетма-кет олтинчи бор АҚШ Конгресси Вакиллар палатаси спикери лавозимига сайлана олмади, деб хабар бермоқда Reuters 5 январь, пайшанба куни. Икки кунлик муваффақиятсиз сайловлардан сўнг конгрессменлар овоз беришни 5 январь куни тушгача (Тошкент вақти билан соат 22:00) қолдиришга қарор қилди.

Олтинчи тур якунида Маккарти талаб қилинадиган 218 та овоздан 201 тасини олди. Республикачиларнинг яна бир вакили Байрон Доналдс 20 овоз олди – уни Маккартини қўллаб-қувватлашдан бош тортган партия аъзолари илгари сурди. Республикачилар рақиби, демократ Ҳаким Жеффрис 212 овоз тўплади. Маккарти аввалроқ ўз номзодини бекор қилмаслигини ва ғалаба қозонмагунча процедурада иштирок этиш ниятида эканлигини маълум қилган эди. 

Янги чақириқдаги Конгресс 3 январь куни ўз ишини бошлади. 2022 йил ноябрь ойида бўлиб ўтган оралиқ сайловлардан сўнг республикачилар Вакиллар палатасини назорат қила бошладилар ва ундаги 435 ўриндан 222 тасини эгаллаб олдилар. Шу тариқа, CNN маълумотларига кўра, Маккарти номзоди зарур 218 та овоз билан маъқулланиши учун, республикачилар фақат тўртта овозни «йўқотиши» мумкин. Тўсиқ «муросасиз консерваторларнинг кичик, аммо қатъий контингенти» позициясига айланди, деб таъкидлайди CNN.  

АҚШ собиқ президенти Доналд Трампнинг Республикачилар партиясининг барча аъзоларига Маккартини қўллаб-қувватлаш ҳақидаги мурожаати ҳам ёрдам бермади, деб таъкидлайди Reuters. «Республикачилар, буюк ғалабани улкан ва шармандали мағлубиятга айлантирманглар», деб ёзди Трамп Truth Social саҳифасида. 

Режага кўра, қуйи палатанинг янги спикери биринчи куни сайланиши керак эди, бироқ олтита турлик овоз бериш жараёнидан кейин ҳам бу амалга ошмади. Бу 100 йил ичида Вакиллар палатаси спикери сайлови бир тур билан чекланмаган биринчи ҳолат эмас: 1923 йилда сайланиш учун тўққиз тур керак бўлган. Бундан аввал демократлар вакили бўлган Нэнси Пелоси АҚШ Конгресси Вакиллар палатаси спикери лавозимини эгаллаб келган.