NYT: Россия Украинада ярадорлар билан бирга 200 мингга яқин киши йўқотди

АҚШ расмий шахслари ва Ғарбнинг бошқа мамлакатлари ҳисоблашича, Украинада ҳалок бўлган ва яраланган россиялик ҳарбий хизматчилар сони 200 мингга яқинлашган. Бу ҳақда The New York Times хабар бермоқда.

Газета маълумотига кўра, Россия сўнгги ойларда энг шиддатли жанглар кечаётган Бахмут атрофида энг кўп йўқотишга учраган. Москва Донбасс шарқини тўлиқ эгаллаш йўлидаги калит деб биладиган бу шаҳарни эгаллаш учун Россия қуролли кучлари қўмондонлиги яхши тайёргарликдан ўтмаган сафарбар қилинганлар ва собиқ маҳбуслардан фойдаланмоқда. NYT нашрининг ёзишича, Россия мудофаа вазирлиги «Вагнер» ёлланма жангчиларига «сарфланадиган материал» сифатида қарайди.

АҚШ мудофаа вазирлигининг юқори мартабали вакили Колин Калнинг сўзларига кўра, россиялик ҳарбийларнинг бундай тактикаси Россияда ўқ-дорилар, жумладан артиллерия снарядлари тугаб бораётгани билан боғлиқ. «Бундай тақчилликни россияликлар «маҳбусларни Бахмут ва Соледарга ёппасига юбориш» орқали қопламоқда», — деган Пентагон вакили.

Шу билан бирга, нашрнинг қайд этишича, шахсий таркибдаги улкан йўқотишлар Владимир Путинни ҳарбий мақсадларидан қайтара оладиган омил бўла олмайди, чунки Москва «улкан ғалабага ўта муҳтож».

«Аслида, Россиянинг йўқотишлари қанчалик катта бўлиши аҳамиятсиз, чунки уларнинг инсоний ресурслари Украинаникидан анча каттароқ. Россияда аскар ҳаёти қадрсиз. Бошқа томондан, ҳалок бўлган аскар — у қандай ўлганидан қатъи назар қаҳрамон ҳисобланади. Ҳалок бўлган аскарларнинг барчасининг ўрнини тўлдириш мумкин ва йўқотишлар миқдори жамоатчиликнинг уруш борасидаги фикрини ўзгартира олмайди», — дея Эстония мудофаа вазирлиги канцлери Кусти Салманинг сўзларини келтиради газета.

Ўз навбатида, Украинанинг йўқотишлари борасида NYT АҚШ Қуролли кучлари штаб бошлиқлари бирлашган қўмитаси бошлиғи Марк Миллининг маълумотига ҳавола қилади. 2022 йил ноябрида у можаронинг икки томонининг йўқотишлари ҳам 100 мингдан ошиши ҳақида айтганди. Шу билан бирга, нашрнинг қайд этишича, Бахмут учун жангларда Украинанинг йўқотишлари ҳам россияликларники каби катта бўлиши мумкин.

2023 йил январида Норвегия қуролли кучлари бош қўмондони генерал Эйрик Кристофферсен Россия ҳалок бўлганлар ва яраланганлар қўшиб ҳисобланганда 180 минг аскаридан айрилганини, Украинанинг йўқотишлари эса 100 мингдан ошишини айтганди. У шунингдек Россия босқини вақтида Украина тинч аҳоли вакилларидан 30 мингга яқин киши ҳалок бўлганини маълум қилган.

«Медиазона», BBC рус хизмати ва кўнгиллилар 3 феврал ҳолатига кўра Украинада ҳалок бўлган россиялик аскарларнинг 13 мингдан ортиғининг шахсига аниқлик киритган. BBC’нинг энг консерватив баҳоларига кўра, Россиянинг ҳалок бўлган аскарлари сони 26 мингдан ошиши мумкин. Уларнинг аксариятини сўнгги уч ойда сафарбар қилинганлар, кўнгиллилар ва маҳбуслар ташкил этади. Сафарбар қилинганлар ва маҳбуслар орасидаги йўқотишлар бутун уруш давомида ҳалок бўлганларнинг 25 фоизига тенг.

Украина қуролли кучлари бош штабининг 3 феврал кунги маълумотида уруш бошидан буён 130 минг россиялик ҳарбий хизматчи ҳалок бўлгани айтилади. РФ мудофаа вазирлиги 2022 йил сентябрида қарийб олти минг россиялик ҳарбий ҳалок бўлгани тўғрисида маълумот берганди. 2022 йил декабрида Украина президенти офисида босқин бошидан буён 10 мингдан 13 минггача бўлган украиналик ҳарбий хизматчилар ҳалок бўлгани айтилганди.