Португалияда минглаб болаларнинг зўрланиши билан боғлиқ можаро авж оляпти

Мустақил комиссия Португалиядаги католик муассасаларда жинсий зўравонлик бўйича ҳисоботни чоп этди. Унинг кўлами ҳайратланарли, лекин кўпчилик жиноятлар учун даъво муддати тугаган.

Фото: Reuters

Сўнгги 70 йил ичида Португалиядаги католик черков муассасаларида 4800 дан ортиқ бола жинсий зўравонлик қурбони бўлган. Бу 13 февраль, душанба куни Лиссабонда бўлиб ўтган матбуот анжуманида ҳисоботи тақдим этилган болалар психиатри Педро Штрехт бошчилигидаги мустақил комиссия ишининг натижасидир, деб ёзади KNA.

Комиссия раҳбарининг таъкидлашича, олинган маълумотлар «энг кичик кўрсаткич» бўлиб, жиноят қурбонларининг аниқ сонини санаб бўлмайди. Қурбонларнинг аксарияти қайта-қайта таҳқирланган ва жиноятлар асосан католик семинариялари, меҳрибонлик уйлари, мактаблар ва спорт иншоотларида содир этилган.

70 фоиздан ортиғида жиноятлар руҳонийлар томонидан содир этилган. Комиссия гувоҳлар ва жабрланувчиларнинг 500 дан ортиқ кўрсатмаларини ҳужжатлаштирди. Бироқ атиги 25 та иш прокуратурага ўтказилган бўлса, қолган жиноятлар бўйича даъво муддати ўтган. Шунга қарамай, Штрехт келгуси ҳафталарда исботланган айбловларга қарамай, мамлакат черковларида хизмат қилишда давом этаётган руҳонийлар рўйхати пайдо бўлишини эълон қилди.

Германияда ҳам сўнгги йилларда бир қанча комиссиялар католик муассасаларда болалар билан боғлиқ зўравонлик ҳолатларини текширган. Бу Кёлнда ўзига хос жанжални келтириб чиқарди, у ерда 2020 йилда архиепископия раҳбарияти ушбу мавзу бўйича черковнинг ўзи топширган, юридик фирмалардан бирининг мутахассислари томонидан тайёрланган ҳисоботни нашр этишдан бош тортди. Бу Германиянинг ушбу минтақасида католик черковдан одамларнинг оммавий чиқиб кетишига олиб келди.