«Россия кўнгиллилар корпуси» Брянскдаги воқеаларга алоқадорлигини эълон қилди

Ўзини Украина қуролли кучларида жанг қилаётган тузилма деб атайдиган «Россия кўнгиллилар корпуси» (РКК) Брянск вилоятидаги воқеаларга алоқадорлигини эълон қилди. 

«РКК» Telegram-каналида Любечандаги фельдшерлар пункти зинапоясида турган икки жангчи акс этган видео пайдо бўлди, бу уларнинг ортидаги белгидан далолат беради. 

«Россия кўнгиллилар корпуси» Россия Федерацияси давлат чегарасини кесиб ўтди. Биз тинч аҳоли билан жанг қилмаймиз, қуролсизларни ўлдирмаймиз, буни ёдда тутинг. Энди Россиянинг оддий фуқаролари қул эмаслигини тушуниш вақти келди. Ғалаён кўтаринг! Жанг қилинг!» - дейди жангчилардан бири. Иккинчиси қўлида «РКК» байроғини ушлаб турибди.

«Россия кўнгиллилар корпуси» Брянск вилояти ҳудудига киргани ҳақидаги маълумот жангчилардан бири анонимлик шарти билан «Важные истории» нашрига берган интервьюсида тасдиқланди. 

«Мен у ердан ҳозиргина келдим. Биз бу вазифани бажаришда 45 киши эдик. Ичкарига кириб, суратга туширдик ва иккита пиёда жанговар машинасини пистирмага олдик. Мен жабрланганларнинг болаларини кўрмадим. Лекин жароҳатланганлардан бири чегарачи эди. Ҳеч ким гаровга олинмади», деди у. 

Бундан олдин Брянск вилояти губернатори Александр Богомаз Сушани қишлоғида автомобиль ўққа тутилгани, натижада бир киши ҳалок бўлгани ва бир бола жароҳатлангани ҳақида хабар берган эди.