Самарқандда 30 нафар «ГАИ» танлов асосида ишга қабул қилинди

Самарқанд вилояти ички ишлар бошқармаси йўл патрул хизматига 30 нафар ёш ходимни ишга қабул қилди. Улар 202 нафар номзод орасидан саралаб олинган.

Ёш ходимларни вазифасига тайинлаш маросимида уларга аҳоли билан ишлашда хушмуомала бўлиш, кўпроқ китоб ўқиш, ҳалол бўлиш ва қоидаларга тўлиқ амал қилиш талаби қўйилди.

Тадбирда танловда қатнашган жами 202 нафар номзодлардан 120 нафари жисмоний тайёргарликдан ўтолмаган. Уч нафари ахлоқий-психологик синовда қониқарсиз баҳоланган ва якуний суҳбатда 39 нафар номзодларнинг билим даражаси пастлиги учун тизимга қабул қилинмаган.

Ёш ходимларнинг аксарияти яқиндагина олий таълим муассасаларини битирган. Ушбу кадрлар йўл ҳаракати хавфсизлиги хизматига тўғридан-тўғри танлов асосида қабул қилиниб, шу вақтга қадар бундай амалиёт бўлмагани маълум қилинди.

Қоидага кўра, ишга қабул қилинган бу ёшларга бир йил давомида тажрибали ходимлар бириктирилади.