Ўзбекистон ва Ҳиндистон ҳарбийлари ўқув машғулотларини якунлади

Ҳиндистоннинг Уттаракханд штати, Бадлани қишлоғида жойлашган 438-мотоўқчилар полкида «Дўстлик-2023» ўзбек-ҳинд қўшма тактик-ўқув машғулотлари якунланди. Бу ҳақда Мудофаа вазирлиги хабар берди.

Ҳамкорликдаги ўқув машғулотларининг якуний қисмида иштирокчилар томонидан икки ҳафта давомида ўзлаштирилган жанговар тайёргарлик машғулотларининг намойиши ташкил этилган. Унда икки мамлакат ҳарбий хизматчилари қўлбола усулларда портлатиш, сигнал берувчи воситаларни турли жойларга ўрнатиш, тоғ тайёргарлиги машғулоти, қояларда ҳар хил усулларда тушиш ва чиқиш, сунъий тоғ тўсиқли йўлагидан ўтиш, қўл жанги элементларини қўллаш, ўрмонзор ва тоғли жойларда ҳамда ёпиқ иншоотларда ўқ отиш машғулотларини ўтказишни амалда кўрсатиб берган.

Ҳиндистонликлар томонидан ўқув тренажёрлари, квадракоптерлар, тунги ва кундузги кузатиш ва масофа ўлчаш мосламалари, қуролли босқинчини қуролсизлантиришга ўргатилган хизмат итлари, шунингдек парвоздаги дронни уриб туширишга ўргатилган бургутларнинг хатти-ҳаракати намойиш этилган.

Шунингдек, тунги вақтда, кўриш даражаси ўта паст вазиятда шартли террористик кучлар жойлашган лагерга ҳужум уюштириш бўйича «Чақмоқ» операцияси ўтказилган.

Маълумот ўрнида, Ўзбекистон ва Ҳиндистон ҳарбий ҳамкорлиги доирасидаги ўқув машғулотлари тўртинчи марта ўтказилди.

Биринчиси 2019 йилда, Тошкент ҳарбий округи ҳудудидаги умумқўшин полигонида, иккинчиси 2021 йилда Ҳиндистондаги Утаранчал штати, Раникхет провинциясидаги «Чаубатия» ўқув марказида, учинчиси 2022 йилда Хоразм вилоятида жойлашган Шимоли-ғарбий ҳарбий округнинг «Янгиариқ» умумқўшин полигонида ташкил этилган эди.