Тошкентнинг қарийб 400 та кўчасига ном берилди

Халқ депутатлари Тошкент шаҳар кенгашининг “Тошкент шаҳридаги айрим географик объектларни номлаш ва қайта номлаш тўғрисида”ги қарори қабул қилинди. Ҳужжат билан Олмазор, Учтепа ва Янгиҳаёт туманларидаги номсиз кўчаларга ном берилмоқда, айримларининг номи эса ўзгартирилмоқда.

Жумладан, Олмазор туманидаги 184 та, Учтепа туманидаги 11 та ҳамда Янгиҳаёт туманидаги 69 та номсиз кўча номланмоқда. Уларнинг аксарияти тор ва берк кўчалар.

Шунингдек, Олмазор туманидаги 19 та, Учтепа туманидаги 3 та ва Янгиҳаёт туманидаги 1 та кўча номи такрорланганлиги туфайли ўзгартирилган.

Олмазор туманидаги номи қонун ҳужжатлари талабларига зид бўлган 15 та кўчанинг номи қайта номланган. Масалан, “Пенза” кўчасига “Анҳор”га, “Талант” кўчаси “Истеъдодга”, “Жонон” кўчаси “Пахта”га ўзгартирилган.

Бундан ташқари, аҳоли пунктлари таркибий қисмларининг географик жойлашуви қайта кўриб чиқилиши натижасида номи ўзгараётган Олмазор туманидаги 39 та, Учтепа туманидаги 50 та ҳамда Янгиҳаёт туманидаги 2 та кўча қайта номланган.