ХВЖ ва Украина 15,6 млрд долларлик кредит бўйича келишиб олди

Украина ва Халқаро валюта жамғармаси 15,6 миллиард долларлик (тахминан 14,5 миллиард евро) янги молиялаштириш пакети бўйича келишиб олди.

Фото: Reuters

Қўллаб-қувватлаш дастури тўрт йилга мўлжалланган, маблағлар урушдан кейинги тикланиш шароитида Украина иқтисодиётининг босқичма-босқич ўсишига ҳисса қўшиши керак, дейилади ХВЖ 21 март, сешанба куни эълон қилинган баёнотда.

Баёнотда айтилишича, ҳали ХВЖ ижро этувчи кенгаши томонидан тасдиқланмаган кредит пакети Украинани Европа Иттифоқига аъзолик йўлида қўллаб-қувватлайди.

Бундан олдин ХВЖ Украинадаги уруш туфайли Марказий Осиёда камбағаллар сони 1 миллионга кўпайишини тахмин қилганди.

Камбағалларга энг жиддий таъсир кўрсатган пандемия туфайли бандликнинг беқарорлашиши ва даромадлар йўқотилишига қўшимча равишда, Россиянинг Украинадаги уруши ва яшаш нархининг инқирози Кавказ ҳамда Марказий Осиёда қашшоқликни қисқартириш жараёнини секинлаштириши мумкин. Бу ҳақда Халқаро валюта жамғармасининг таҳлилий ҳисоботида айтилган.