Франция ўз фуқароларини Судандан эвакуация қилишни бошлади

Франция дипломатлар ва француз фуқароларини Судандан эвакуация қилиш учун операция бошлади. 23 апрел, якшанба куни Парижда Ташқи ишлар вазирлигининг маълум қилишича, операция давомида Европа Иттифоқининг бошқа давлатлари ва “иттифоқдош ҳамкор давлатлар” фуқаролари ҳам хавфсиз жойга келтирилади.

Дипломатларнинг сўзларига кўра, Судан армияси ва унга душман бўлган Тезкор ҳаракат хизмати ҳарбийлаштирилган гуруҳи аввалроқ Франция эвакуация қилиш миссиясига хавфсизлик кафолатларини берган. ТИВ маълумотларига кўра, Суданда Франциянинг 250 га яқин фуқароси истиқомат қилади.

Нидерландия ҳам ўз фуқароларини Судандан эвакуация қилиш учун операция бошлади. “Нидерландия Иордания жамоаси билан биргаликда нидерланд фуқароларини у ердан имкон қадар тез ва хавфсиз олиб чиқиш учун барча имкониятларни ишга солади”, деб ёзди ташқи ишлар вазири Вопке Хекстра Twitter’да.

15 апрелдан бери Суданда Абдул Фаттоҳ ал-Бурхон бошчилигидаги мунтазам армия ва Муҳаммад Ҳамдан Дагало бошчилигидаги Тезкор ҳаракат кучлари ўртасидаги зиддият кескин авж олди. Жанглар оқибатида аллақачон юзлаб одамлар ҳалок бўлди, минглаб фуқаролар яраланди.