Нидерландияда Путиннинг собиқ куёвига тегишли ер участкаси хатловга олинди

Нидерландия ҳукумати Путиннинг собиқ куёви Йоррит Фаассенга қарши жиноий иш қўзғатиши мумкин, дея хабар берилади “Проект”, Follow the money ва The Guardian суриштирувида.

Фото: Dmitry Kostyukov/New York Times/Redux/eyevine

Нидерландия прокуратураси Владимир Путиннинг тўнғич қизи деб ҳисобланувчи Мария Воронцованинг собиқ эри Йоррит Фаасенга тегишли Амстердам чеккасидаги ер участкасини хатловга олди. Мулк хатловга олингани ҳақида 25 май, пайшанба куни "Проект", Follow the money нидерланд нашри ва Британиянинг The Guardian газетаси хабар берди.

Суриштирув маълумотларига кўра, Путиннинг собиқ куёви Дуйвендрехт туманида 1432 квадрат метр ер участкасига эга. Узоқ вақт давомида Путиннинг дўстлари Аркадий ва Борис Ротенберг тузилмалари ерга эгалик қилишган, аммо кейин Фаассен уни 450 минг еврога сотиб олган. 2021 йилда у ерда турар жой биноси ва олтита офис майдони қуришга қарор қилди.

12 май куни Нидерландия прокуратураси ерни молиявий, иқтисодий ва экологик ҳуқуқбузарликлар туфайли тортиб олди, деб ёзади The Guardian. Адвокат Хелен Овер де Линденнинг тан олишича, Фаассен жиноий ишда айбланувчига айланиши мумкин, аммо унинг сўзларига кўра, ҳозирча мавжуд ҳужжатлардан буни аниқлаш мумкин эмас.

Фаассеннинг таниши "Проект" нашрига айтишича, Путиннинг собиқ куёви яқинда Амстердамга учиб келган, бироқ нидерланд ҳуқуқ-тартибот идоралари унга қизиқиш билдиргани учун Россияга қайтишга мажбур бўлган. Нидерландия разведкасидаги манбанинг айтишича, Фаассен Амстердамга келганида санкциялардан бўйин товлаш эҳтимоли бўйича сўроқ қилинган.