ЖЧ U-20. Ўзбекистон ёшлар жамоаси 1/8 финалда Исроил билан ўйнайди

Аргентинада бўлиб ўтаётган ёшлар ўртасидаги жаҳон чемпионатида 3-тур доирасидаги навбатдаги ўйинлардан кейин Ўзбекистон вакилларининг плей-оффдаги илк рақиби маълум бўлди.

С гуруҳида Колумбия Сенегал билан дуранг ўйнади (1:1) ва пешқадам сифатида плей-офф босқичга чиқди. Япония эса 68-дақиқада камчиликда қолган Исроилга ютқазиб қўйди (1:2). 

Натижада ушбу гуруҳда 2-ўринни эгаллаган Исроил Ўзбекистоннинг 1/8 финалдаги рақибига айланди. Жамоалар ўртасидаги беллашув 30 май куни бўлиб ўтади.

А гуруҳида иштирок этган Равшан Ҳайдаров шогирдлари дастлабки турда мезбон Аргентинага қарши ўйинда ҳисобни очганига қарамай, ютқазди (1:2), кейин Янги Зеландия билан ўйинда 2 тўп фарқи билан ортда бора туриб дурангга эришди (2:2), сўнгги турда эса гуруҳ аутсайдери Гватемалани осонлик билан мағлуб этиб (2:0), кейинги босқич масаласини ҳал қилди.

Лекин ўша ўйинда ўзбекистонликлар жамоаси сардори Умарали Раҳмоналиев гуруҳ босқичида иккинчи сариқ карточкасини олди ва плей-офф ўйинини ўтказиб юборадиган бўлди. 

D гуруҳида Бразилия Нигерияни мағлуб этди (2:0), Италия Доминикандан устун келди (3:0). Бу гуруҳдан Бразилия, Италия ва Нигерия нимчоракфиналга йўлланма олди.

ЖЧ U-20. 3-тур. 27 май
С гуруҳи
Япония — Исроил 1:2
Голлар: Сакамото (45+1) — Нави (76), Сениор (90+2). 
Четлатиш: Бинямин (68). 

Колумбия — Сенегал 1:1
Голлар: Кортес (90+5) — Камара (30). 

D гуруҳи
Бразилия — Нигерия 2:0
Голлар: Педросо (43), Маркиньос (45+2). 

Доминикан — Италия 0:3
Голлар: Казадеи (19, 84), Амброзино (50).