Ҳаагадаги намойишларда 1500 дан ортиқ экофаоллар қўлга олинди

27 май куни Ҳаагада “Йўқ бўлиб кетишга қарши қўзғолон” (Extinction Rebellion) экофаоллар ҳаракати томонидан уюштирилган намойишнинг камида 1579 нафар иштирокчиси қўлга олинди, деб хабар қилмоқда AFP ва dpa ахборот агентликлари Нидерландия полициясига таяниб.

Акциядан мақсад ёнилғи қазиб олиш учун давлат томонидан субсидиялар ажратилишига қарши норозилик билдириш эди. Ташкилотчиларга кўра, тадбирда 6 мингга яқин киши иштирок этган. Намойишчилар шаҳардан ўтувчи А12 автомагистралида ҳаракатни тўсиб қўйишди. Бу шундай шиорлар остида ўтган автомагистралдаги биринчи ҳаракат акцияси эмас. Март ойида ҳам худди шундай намойишда 700 га яқин одам қўлга олинган эди.

ОАВ хабарларига кўра, ушланганларнинг камида 40 нафари жиноий жавобгарликка тортилади. Бошқа нарсалар қаторида, улар мулкка зарар етказиш, давлат амалдорларини ҳақорат қилиш ва бир ҳолатда фаол полициячини тишлаганликда айбланмоқда. Айни вақтда, ҳуқуқ-тартибот идоралари ходимлари намойишчиларни тарқатиш учун сув пуркагичлардан фойдаланган.

Қўлга олинганлар орасида нидерландиялик бир қанча машҳур шахслар, жумладан, “Тахтлар ўйини” сериалидаги Мелисандра роли билан танилган актриса Карис ван Хаутен ҳам бор. ANP агентлигига кўра, у кейинроқ полиция бўлимидан қўйиб юборилган.