Qatar Airways янги самолётларида биринчи классдан воз кечади

Дунёнинг энг яхши авиакомпанияларидан бири Qatar Airways ўзининг янги авлод узоқ масофали Boeing самолётларида биринчи тоифали салонни таклиф қилмайди, дея хабар берди ташувчининг бош директори Акбар Ал-Бакир Bloomberg агентлигига. Унинг сўзларига кўра, энг ҳашаматли ўриндиқларга сармоя киритиш даромадлар билан оқланмайди ва авиакомпаниянинг бизнес класси ҳам шундай имтиёзларни тақдим этади. 

Биринчи классдан воз кечиш стратегик хавфларни келтириб чиқариши мумкин, чунки бошқа йирик авиакомпаниялар, жумладан Германиянинг Lufthansa, Австралиянинг Qantas Airways ва Франциянинг Air France премиум хизматларга кўпроқ эътибор қаратмоқда, деб таъкидлади Bloomberg. Lufthansa раҳбари Карстен Спорнинг таъкидлашича, дам олиш мақсадида парвоз қилувчи саёҳатчилар махсус тақдим этилган шароитларни афзал кўришади ва компания самолётларининг олд қисми (биринчи класс жойлашган) аввал ҳеч қачон бунчалик гавжум бўлмаган, деб ёзади агентлик. 

Bloomberg хабарига кўра, Qatar Airways авиакомпаниясининг Boeing 777X самолётларида биринчи класс мавжуд бўлмайди. У Qatar Airways авиакомпаниянинг 10 та Airbus А380 самолётларини фойдаланишдан олганидан сўнг энг йирик самолётга айланади. Самолётларда класслар аста-секин мослашувчан бўлиб бормоқда: авиакомпаниялар бизнес-класс ва бюджет ўриндиқлари ўртасида премиум-эконом тақдим этяпти, биринчи класс эса кўпроқ топ-менежерлар ёки умрида бир марта саёҳатга катта сармоя киритишга тайёр бўлган оддий йўловчилар қизиқиши бўлиб қолмоқда, дейди агентлик. 

Qatar Airways Skytrax консалтинг компанияси томонидан кетма-кет еттинчи марта 2022 йилда дунёнинг энг яхши авиакомпанияси деб топилди. 2022 йилда иккинчи ўринда Singapore Airlines, учинчи ўринда Emirates жойлашди. Австралиянинг Qantas авиакомпанияси бешинчи ўринни эгаллади. Кучли ўнталикка, шунингдек, Japan Airlines, Turkish Airlines, Air France, Korean Air ва Swiss International Air Lines кирди.