Хитой Россияга қурол етказмасликка ваъда берди – Блинкен

Хитой расмийлари Америка томонини Россияга ҳалокатли қурол етказиб бермагани ва етказиб бериш ниятида эмаслигига ишонтирди. Аммо Вашингтон буни хусусий компаниялар амалга ошириши мумкинлигидан хавотирда. Бу ҳақда Пекинга ташриф буюрган АҚШ Давлат котиби Энтони Блинкен айтди, деб ёзди CNN.

Дипломатнинг сўзларига кўра, у Хитой томонидан бундай кафолатларни олганидан хурсанд ва ҳозирча бу кафолатларни инкор этувчи далиллар йўқ.

«Бироқ, биз доимо Хитой компанияларидан хавотирдамиз, улар Россиянинг Украинадаги агрессиясини кучайтириш учун фойдаланиши мумкин бўлган технологияларни тақдим эта олади. Биз Хитой ҳукуматидан бу борада ўта ҳушёр бўлишни сўрадик», деди Блинкен.

Ўтган ҳафта охирида АҚШ Давлат котиби (ташқи ишлар вазири) Энтони Блинкен расмий ташриф билан Пекинга борди. Сўнгги 5 йил ичида биринчи марта амалга оширилаётган бундай ташриф унинг катта аҳамиятидан далолат беради. Ҳозир АҚШ ва Хитой муносабатлари ўта кескин ва томонлар уни юмшатиш ниятида.

Ушбу ташриф доирасида Блинкен бошқа нарсалар қатори Хитой раҳбари Си Жинпинг билан ҳам учрашди. Муҳокаманинг асосий мавзуси, шубҳасиз, Тайван атрофидаги вазият эди. Бироқ, сўнгги пайтларда Украина мавзуси иккала давлат учун ҳам катта аҳамиятга эга бўлди.

Шуниси эътиборга лойиқки, ушбу ташрифдан бироз олдин Чеченистон раҳбари Рамзан Қодиров Хитойда ишлаб чиқарилган янги зирҳли машиналар билан мақтанган эди. Хитой расмийлари бундай таъминот бўлмагани ҳақида умумий баёнот берди. Аммо Қодиров жангарилари зирҳли машиналарни қаердан олган бўлиши мумкинлигига ойдинлик киритмади.