Дмитрий Кулеба: Украинанинг НАТОга бўлган йўли қисқаради

Украина ташқи ишлар вазири Дмитрий Кулеба 8 июль, шанба куни кечқурун Instagram’да президент Володимир Зеленскийнинг Болгария, Чехия, Словакия ва Туркияга ташрифи якунларини сарҳисоб қилар экан: «Украина ва НАТО учун бир қанча муҳим қарорлар келишиб олинди», деб ёзди.

«Бу жуда муҳим натижа, бошқа кўп ҳолларда бўлгани каби бизга бу содир бўлмаслиги айтилган эди, лекин буни энг яқин ҳамкорларимиз билан бирга қилдик», деб қўшимча қилди Кулеба. Шу билан бирга, у 11—12 июль кунлари Вилнюсда бўлиб ўтадиган НАТО саммити якунларига кўра, Украинанинг Шимолий Атлантика альянсигача бўлган йўли «албатта қисқаришини» таъкидлади. 

Шу билан бирга, Украина дипломатияси раҳбарининг таъкидлашича, бугунги кунда «Украинанинг НАТОга қўшилиш таклифи бўйича аниқлик йўқ». «Ҳозир бунга аниқлик киритиш учун ноёб вақт. НАТО учун бу имкониятни қўлдан бой бериш Путинга барча жабҳаларда совға беришни англатади», деди Кулеба. 

Зеленскийнинг Чехияга ташрифи чоғида президент Петр Павел Украинани уруш тугаганидан сўнг дарҳол НАТОга аъзо бўлиш бўйича музокараларни бошлашга чақирди. «Бу бизнинг хавфсизлигимиз, минтақавий барқарорлик ва иқтисодий фаровонлик манфаатларига ҳам жавоб беради», деди у. Унга кўра, Чехия жорий йилда ҳам Украинанинг ЕИга кириши бўйича музокараларни бошлаш устида иш олиб боради. 

Аввалроқ Болгария парламенти кўпчилик 157 овоз билан Украинанинг уруш тугаганидан кейин НАТОга аъзо бўлишини қўллаб-қувватловчи декларацияни қабул қилган эди. 

Июнь ўрталарида Зеленский идораси раҳбари ўринбосари Игор Жовква 20 давлат унинг мамлакатининг Шимолий Атлантика альянсига аъзолигини қўллаб-қувватлашини айтди. Киев НАТОга аъзо бўлиш учун 31 давлат розилигини олиши керак. 

16 июнь куни ташкилот бош котиби Йенс Столтенберг матбуот анжуманида Шимолий Атлантика альянсининг Вилнюсдаги саммитида унинг аъзолари «таклифномани эмас, Украинани НАТОга қандай яқинлаштиришни муҳокама қилишини» билдирди.