Полшада нефт сизиб чиқиши сабабли «Дружба» қувури иши тўхтатилди

Беларус ва Полша орқали Германияга ўтувчи «Дружба» нефт қувурининг шимолий тармоғида сизиб чиқиши аниқланди. Бу ҳақда 5 август, шанба куни «Дружба» нефт қувурининг Полша участкаси оператори PERN маълум қилди ва сизиб чиқиш Полша марказидаги Ходеч шаҳри яқинида содир бўлганини таъкидлади. Ушбу нефт қувури орқали нефтни етказиб бериш тўхтатилган, ҳодиса сабаблари ҳақида ҳеч нарса маълум эмас. 

PERN компаниясининг хабар беришича, сизиб чиққан жойда давлат ёнғин хавфсизлиги хизмати ва компания фавқулодда хизматлари ишламоқда. Таъмирлаш ишлари тугагандан сўнг, ифлосланган тупроқни қайта тиклаш бошланади, деб хабар қилди PERN. У воқеа Полшада ёнилғи билан боғлиқ ҳолатга таъсир қилмаслиги кераклигини таъкидлади. Шунингдек, нефт қувури иши 8 август куни эрталаб тикланиши мумкинлиги ҳақида хабар берилди. 

«PERN инфратузилмасининг бошқа элементлари, жумладан, танкерлар билан Полшага, сўнгра Германияга келаётган хом нефтни ҳайдаш учун фойдаланиладиган Поморский участкаси нормал ишлаяпти», — дея қўшимча қилди компания. 

Илгари Россия нефти ҳам Германияга «Дружба»нинг шимолий тармоғи орқали етказиб берилган, бироқ Россиянинг Украинага тўлиқ бостириб киришидан кейин Германия Россиядан хом нефт қабул қилишдан бош тортишга қарор қилди. Айни вақтда Қозоғистон нефти «Дружба» орқали Германияга борган. 2022 йил октябр ойида PERN Плоцк шаҳри яқинида сизиб чиқиш аниқлангани ҳақида хабар берган эди.