НАТО Косовога яна 200 га яқин британиялик ҳарбийни юборади

Косоводаги кескин вазият туфайли НАТО бу мамлакатга Уэлс маликаси қироллик полкининг 1-баталонидан 200 га яқин қўшимча британиялик аскарни жўнатмоқда. Якшанба куни НАТО матбуот котиби Дилан Уайтнинг айтишича, улар ҳарбий машғулотлар учун Косовода жойлашган KFOR тинчликпарвар кучлари таркибидаги 400 нафар британияликнинг ёнида жойлаштирилади. Бошқа иттифоқчилар ҳам KFOR контингентини оширади, деди у. Британия армияси бўлинмаси НАТОнинг Европадаги иттифоқчи кучлари қўмондони, америкалик генерал Кристофер Каволи махсус илтимосига кўра НАТО Косоводаги кучлари қўмондони ҳузурига жўнатилди. 

Алянс контингентнинг кучайишига сабаб сифатида 24 сентябр куни Косово полициясига қилинган ҳужум ва минтақада кескинлик кучайганини кўрсатмоқда. НАТО Белград ва Приштинани «узоқ тинчлик»ка эришиш учун мулоқотга чақирди. «Уэлс маликаси қироллик полкининг 1-баталони жойлаштирилиши Буюк Британия Қуролли кучларининг тезкорлигини намойиш этади. Биз НАТОнинг муҳим қисми бўлиб, ҳарбий тажрибамиз ва қудратимиз билан бўлишишда давом этмоқдамиз», деди Буюк Британия мудофаа штаби бошлиғи адмирал Энтони Радакин. Лондоннинг Косоводаги тинчликпарвар кучларни қўллаб-қувватлаётгани Буюк Британиянинг Шимолий Атлантика алянси ва Ғарбий Болқон минтақаси хавфсизлигига содиқлигини таъкидлайди, дея қўшимча қилди у. 

Косовода полицияга ҳужум ортидан кескинлик кучайди

Косово шимолидаги вазият бир ҳафта олдин мураккаблашди. Косово расмийларининг билдиришича, полиция 24 сентябрга ўтар кечаси Косовонинг Банска қишлоғига бостириб кириб, серб православ монастирида тўсиқ ўрнатган 30 нафар қуролли серб билан тўқнашган. Уч ҳужумчи ва бир полициячи ҳалок бўлди. 

Косовонинг 1,8 миллион аҳолиси катта қисми этник албанлардир. Бундан ташқари, мамлакатда, асосан, шимолда 120 минг серб яшайди. 2008 йилда Косово бир томонлама равишда Сербиядан мустақиллигини эълон қилди. 100 дан ортиқ давлатлар унинг мустақиллигини тан олди, лекин Сербия ҳалигача собиқ вилоятини қайтариб олишга уриняпти.

НАТОнинг KFOR тинчликпарвар миссияси 1999 йил июн ойидан бери фаолият юритиб келмоқда. 28 давлат KFOR’га ўз ҳарбийларини тақдим этади. Буюк Британиянинг KFOR бўйича мажбурияти 2023 йил май ойида қуролли кучлар бўйича вазир Жеймс Хиппи Лондон камида 2026 йилгача НАТОнинг Ғарбий Болқондаги миссиясига ҳисса қўшишда давом этишини эълон қилганида янгиланди.