АҚШ шошилинч ҳарбий ёрдамининг биринчи партияси Исроилга етиб борди

Фавқулодда ҳарбий ёрдам доирасида АҚШ томонидан юборилган ўқ-дориларни олиб борган биринчи самолёт ҲАМАС ҳаракатининг мамлакатга ҳужуми фонида Исроилга қўнди. Бу ҳақда 10 октябр, сешанба куни Исроил ҳарбийларига таяниб, Reuters агентлиги хабар берди.

Аввалроқ АҚШ президенти Жо Байден АҚШ Мудофаа вазирлиги Яқин Шарққа «Жералд Форд» авиаташувчи кемаси ва бир неча эскадриля қирувчи самолётларидан ташқари қўшимча кучларни жойлаштиришга тайёрлигини айтганди. 

Байден маъмурияти вакиллари 8 октябр куни АҚШ Конгресси Вакиллар палатаси раҳбарияти билан Исроилни қўллаб-қувватлашни кучайтиришни муҳокама қилди. Гап, хусусан, «Темир гумбаз» ҳаво мудофааси тизими учун мавжуд шартномалар бўйича артиллерия снарядлари ва ракеталарини етказиб бериш ҳақида борган. The Washington Post газетасининг ёзишича, Исроил иттифоқдошидан бошқа ўқ-дориларни ва қўшимча равишда Вашингтондан разведка маълумотларини алмашиш соҳасида ҳамкорликни кенгайтиришни сўраган. Оқ уй раҳбари Конгрессни Исроилга ҳарбий ёрдам учун янги маблағ ажратишни маъқуллашга чақирди. 

Давлат департаменти раҳбари Исроил ва Иорданияга ташриф буюради 

Шу билан бирга, АҚШ давлат котиби Энтони Блинкен 11-13 октябр кунлари Исроил ва Иорданияга расмий ташриф билан боради ҳамда у ерда «юқори мартабали амалдорлар билан учрашади», дея маълум қилди АҚШ Давлат департаменти. «Давлат котиби Исроилга қилинган ҳужумлар қурбонлари яқинларига яна бир бор ҳамдардлик билдиради, бу ҳужумларни имкон қадар кескин қоралайди ва Қўшма Штатларнинг Исроил ҳукумати ва халқи билан бирдамлигини тасдиқлайди. У Исроил хавфсизлигини мустаҳкамлаш, Исроилнинг ўзини ҳимоя қилиш ҳуқуқини сўзсиз қўллаб-қувватлаш масалаларини кўриб чиқади», дейилади расмий баёнотда.