АҚШ Украинага ваъда қилинган Abrams танкларининг барчасини етказиб берди 

Қўшма Штатлар Украинага ваъда қилинган 31 та M1A1 Abrams танкини тўлиқ етказиб берди, деди АҚШ армиясининг Европа ва Африка қўмондонлиги вакили полковник Мартин О'Доннелл. 

«Биз келишувларимизни бажардик. Бундан буён украиналиклар бу техникани қачон ва қаерда ишлатишни ўзлари ҳал қилади», деб қўшимча қилди у. 

Полковникнинг таъкидлашича, Германияда ушбу танклардан фойдаланиш бўйича ўқитилган барча украиналиклар Украинага қайтган, ўқ-дорилар ва эҳтиёт қисмлар ҳам у ерга етказилган. 

Аввалроқ, 23 сентябр куни ушбу танкларнинг биринчи партияси Украинага етиб боргани ҳақида хабар берилган эди. 

Август ойида АҚШ ҳукумати Abrams танкларининг биринчи партиясини Украинага етказишга рухсат берди. 

Июн ойи бошида 200 нафарга яқин украиналик ҳарбийлар гуруҳи Германияда Abrams танкларини бошқаришни ўрганаётгани маълум бўлди. 

Дастлаб, Қўшма Штатлар Украина учун янги версиядаги 31 та M1A2 Abrams танкини ишлаб чиқариши ҳақида гап кетаётган эди. Аммо бунинг учун 1-2 йил муҳлат талаб қилинарди. Шу сабабли, АҚШ танкларнинг эскироқ M1A1 версиясини Украинага беришга қарор қилди. 

Қайд этилишича, янги М1А2 модели эскирган версия билан солиштирганда, яхшиланган бошқарув тизимига эга. Бундан ташқари, иккала модел ҳам 120 мм тўп билан жиҳозланган.