Қозоғистоннинг собиқ адлия вазири ҳибсга олинди 

Қозоғистонда собиқ адлия вазири мансаб ваколатини суиистеъмол қилганликда гумонланиб ҳибсга олинди. У Коррупцияга қарши кураш хизмати ходимлари томонидан ушланган. 

«У шуъба компания манфаатларини ҳимоя қилган ва кераксиз хизматлар кўрсатиш бўйича очиқдан-очиқ йиллик шартномалар тузиб, бу билан давлатга катта миқдорда зарар етказган», дейилади хабарда. 

Маълумотларда қўлга олинган шахснинг исми келтирилмаган. Аммо маҳаллий ОАВ маълумотларига кўра, гап 2016-2022 йилларда Адлия вазирлигида раҳбарлик қилган ва «январ воқеалари»дан кейин ишдан бўшатилган Марат Бекетаев ҳақида кетмоқда. 

Қайд қилинишича, у 21 октябр куни эрталаб Остона аэропортида «ўзганинг машинаси ва курткасида» етиб келганида қўлга олинган. У Истанбул орқали Лондонга учишга ҳаракат қилган. Бироқ мамлакатни тарк этишга уриниш муваффақиятсиз тугагани айтилмоқда. 

Аввалроқ, собиқ вазирдан яшаш жойини тарк этмаслик ҳақида тилхат олинган эди. У Миллий хавфсизлик қўмитасининг собиқ раиси Карим Масимов «ҳомийлиги» остида активларни мамлакатдан чиқариш билан билан шуғулланган Bolashak Consulting Group ширкати ишига аввал гувоҳ, кейин эса гумонланувчи сифатида жалб қилинган. Масимов шу йилнинг апрел ойида давлатга хиёнат, ҳокимиятни эгаллаб олишга уриниш ва бошқа жиноятлар учун 18 йиллик қамоқ жазосига ҳукм қилинган эди.