Британия собиқ бош вазири Дэвид Кэмерон ташқи ишлар вазири бўлди

Мамлакат ҳукуматидаги юқори лавозимларда тайинловлар амалга оширилди.

Фото: Reuters

Буюк Британия собиқ бош вазири Дэвид Кэмерон ташқи ишлар вазири этиб тайинланди. Бу ҳақда Британия ҳукумати хабар берди. Собиқ ташқи ишлар вазири Жеймс Клеверли ички ишлар вазири этиб тайинланди.

Британия ҳукуматидаги кадрлар ўзгариши Буюк Британия Ички ишлар вазирлигининг собиқ раҳбари Суэлла Браверман ишдан бўшатилиши ортидан юз берди. У The Times газетасида шов-шувли мақола ёзди, жумладан, Фаластин тарафдорлари намойишида полициянинг ҳаракатларини танқид қилди.

Дэвид Кэмерон 2010-2016 йилларда Буюк Британия бош вазири бўлган. Унинг раҳбарлигида мамлакатнинг Европа Иттифоқидан чиқиши ҳақида муҳокама бошланди, якунда Буюк Британия аҳолиси Brexit учун овоз берди. Шу билан бирга, Кемероннинг ўзи Британиянинг Европа Иттифоқидаги аъзолигини сақлаб қолиш тарафдори бўлган ва референдумнинг эртасигаёқ истеъфога чиқди. Унинг ўрнини Тереза Мэй эгаллади.

#Буюк Британия #Дэвид Кэмерон #Суэлла Браверман