Исландияда вулқон отилиши кутилмоқда, фавқулодда ҳолат эълон қилинди 

Исландияда бир қатор зилзилалардан сўнг Фаградалсфядл вулқонининг отилиши эҳтимоли кескин ошди, деб хабар берди BBC. Маҳаллий ҳокимият вулқондан 8 км узоқликда жойлашган Гриндавик шаҳри аҳолисини эҳтиёт чораси сифатида уйларини тарк этишга чақирди. Мамлакатда фавқулодда ҳолат эълон қилинди. 

Сўнгги бир неча ҳафта ичида Фаградалсфядл вулқони жойлашган ҳудудда минглаб ер силкинишлари қайд этилган. Унинг ёнида Кефлавик халқаро аэропорти жойлашган. 

Исландия университетининг вулқоншунослик профессори Тор Тордасоннинг айтишича, магма ҳозирда ер сатҳидан 800 метр чуқурликка яқинлашган, шу боис вулқоннинг отилиш эҳтимоли жуда катта. 

2010 йил апрел ойида Исландиядаги Эйяфятлайокудл вулқонининг отилиши Иккинчи жаҳон урушидан бери Европа ҳаво ҳудудининг энг катта ёпилишига олиб келган эди. 7 кун давомида Европанинг аксарият мамлакатлари осмони қитъани қоплаган улкан вулқон кул булути туфайли парвозлар учун ёпилди. Оқибатда, ўнлаб авиакомпаниялар тахминан 10 миллион йўловчини йўқотиб, жами 100 мингга яқин рейсларни бекор қилишига тўғри келди. Фаградалсфядл вулқони отилиши ҳам шундай оқибатларга олиб келиши мумкин. 

Исландия дунёдаги энг геологик фаол минтақалардан бири бўлиб, унинг ҳудудида 30 га яқин фаол вулқонлар мавжуд. Сўнгги 1 ойда Исландия жануби-ғарбий қисмида 20 мингдан ортиқ ер силкинишлари қайд этилган. 

Фаградалсфядл вулқони 8 аср давомида ҳаракатсиз эди.