Россияда VPN-провайдер биринчи марта «чет эл агенти» деб эълон қилинди

Россия Адлия вазирлиги актриса Яна Троянова, журналист Иля Бер, «Ночлежка»нинг собиқ раҳбари Григорий Свердлин, сиёсатшунос Александр Морозов ва The Moscow Times интернет-нашрини «чет эл агентлари» рўйхатига киритди.

Фото: Евгений Разумный/Ведомости/ТАСС

17 ноябр, жума куни Россия Адлия вазирлиги «чет эл агентлари» рўйхатини яна бир бор кенгайтирди. Рўйхатга биринчи марта VPN-провайдер киритилди – HideMyName VPN-сервисига эгалик қилувчи Hidemy.network Ltd компанияси. Маҳкама маълумотларига кўра, компания «чет эл агентлари» материалларини, шунингдек, Россия ҳукумати қарорлари ҳақидаги «ишончсиз маълумотларни» тарқатган.

Бундан ташқари, россиялик актриса Яна Троянова «чет эл агентлари» рўйхатига киритилган. Вазирликнинг таъкидлашича, у Россия ҳукумати сиёсати ҳақида «фейклар» тарқатган ва Россия армиясининг салбий имижини яратишга ҳаракат қилган. Трояновадан ташқари рўйхат журналист ва «Проверено.Медиа» сайти яратувчиси Иля Бер, «Ночлежка» лойиҳасининг собиқ раҳбари Григорий Свердлин, сиёсатшунос Александр Морозов, шунингдек, The Moscow Times интернет-нашри билан тўлдирилди.

Ўзини «Чет эл агентлари» рўйхатига киритган йигит

Бундан ташқари, «чет эл агенти» сифатида фаолият юритиш ниятида бўлган шахснинг аризаси асосида М.И.Никандров реестрга киритилди», — дейилади Адлия вазирлиги хабарида. «Холод» интернет-журналига кўра, гап псковлик журналист Марат Никандров ҳақида кетмоқда.

Шу билан бирга, The Insider нашрининг ёзишича, Никандров 19 ёшда бўлиб, у ўзини ҳазиллашиб рўйхатга киритган. «Аслида, мен буни [рўйхатга қўшилиш] мумкин деб ўйламаган эдим, яъни, бу ўз-ўзидан содир бўлди, ростини айтсам. Мен паспорт маълумотларимни, кейин СНИЛС ва ИННни киритдим. Улар на бошқа маълумотни, на маблағ манбасини, умуман, бошқа ҳеч нарсани сўрамади», — дея йигитнинг сўзларини келтиради нашр.

Бир неча юзлаб «чет эл агентлари»

Россияда «чет эл агентлари» тўғрисидаги қонун 2012 йилда пайдо бўлган. Ўшандан бери бир неча юзлаб ташкилотлар ва шахслар тақиқ рўйхатига киритилди.

Жисмоний шахслар – «чет эл агентлари» реестри 2022 йил апрел ойи бошида ишга туширилган бўлиб, у ННТлар – «чет эл агентлари», ОАВ – «чет эл агентлари» ва рўйхатдан ўтмаган ташкилотлар – «чет эл агентлари» рўйхати билан бир қаторда тўртинчи рўйхат бўлди. 2022 йил декабр ойидан бошлаб қонун, Россия расмийларига кўра, «чет элдан ёрдам оладиган» ва «хорижий таъсир остида» бўлганларни «чет эл агентлари» деб эълон қилиш имконини беради.