Зеленский Трампнинг тинчлик режасини муҳокама қилишга тайёрлигини айтди

Агар Доналд Трамп АҚШ президентлик сайловларида ғалаба қозонса, Украина президенти Володимир Зеленский Россия ва Украина ўртасида сулҳ тузиш бўйича унинг аниқ таклифларини муҳокама қилишга тайёр. Зеленский бу ҳақда 22 ноябр, чоршанба куни Fox News телеканалига берган интервюсида айтди.

«Келинг, у билан гаплашамиз, унинг тинчлик формуласида қандай қадамлар борлигини кўрсатиш имкониятини берайлик. Мен тайёрман, албатта (мулоқот қилишга). Агар унинг аниқ тинчлик режаси бўлса, мен билан бўлишиши мумкин», - дея жавоб берди Зеленский бошловчининг Трамп таклифлари ҳақидаги саволига. «Ҳа, агар биз Донбасс ва Қримни Россияга берсак, бу урушни тўхтата оламиз. Менимча, бизнинг мамлакатимиз бундай тинчлик режасига тайёр бўлмайди. Бу тинчлик режаси эмас», - дея таъкидлади президент. 

Трампнинг «тинчлик режаси» 

АҚШ собиқ президенти, яна бу лавозимга даъвогарлик қилаётган Доналд Трамп агар ҳокимият тепасига келса, Украинадаги урушни «24 соат ичида» тўхтатишини айтди. Бу ёзда у шу мақсадда Зеленский ва Путинга ултиматум қўйишини айтди. «Мен Зеленскийга: «Етарли. Сиз битим тузишингиз керак», дейман. Путинга эса: «Агар келишув тузмасангиз, биз унга кўп нарсани берамиз. Агар керак бўлса, олганидан ҳам кўпроқ берамиз», дейман. Мен бир кунда битимга эришаман. Бир кунда», деди Трамп. 

Зеленский бунга жавобан Трампга 24 дақиқа ичида АҚШ собиқ президенти «бу можарони бошқара олмаслигини» тушунтириши мумкинлигини айтди. Зеленский 20 ноябр куни The Sun нашрига берган интервюсида Доналд Трамп билан музокара столига ўтиришга ва агар у АҚШ президенти этиб сайланса, тинчлик режасини тинглашга тайёрлиги ҳақида гапирди. Унинг қайд этишича, украиналиклар урушдан чарчаган, бироқ Россия билан тинчлик шартномаси бўйича музокараларни қўллаб-қувватламаяпти.