Франция парламенти мунозарали иммиграция қонунини рад этди

Франция парламентининг қуйи палатаси – Миллий ассамблея мунозарали иммиграция қонуни лойиҳасини рад этди. «Яшиллар» партиясининг ҳужжатни кўриб чиқишдан бош тортиш ҳақидаги таклифини 11 декабр, душанба куни 270 нафар парламентарий, жумладан, ўнг ва сўл кучлар вакиллари, шунингдек, Марин Ле Пен «Миллий фронт»ининг ўнг қанот популистлари қўллаб-қувватлади.

Ушбу қонун лойиҳасининг рад этилиши мамлакат ҳукумати ва президент Эммануэл Макрон учун жиддий сиёсий мағлубият сифатида кўрилмоқда. Кўп ўтмай, Франция ички ишлар вазири Жерар Дарманен истеъфога чиқиш ҳақида ариза берди, бироқ Макрон унинг илтимосини рад этди, дея маълум қилди Елисей саройи.

Қонун лойиҳасининг асл нусхасида мигрантларнинг интеграциялашувига кўмаклашиш, шунингдек, Францияга ноқонуний йўллар билан келганларни депортация қилишни соддалаштириш назарда тутилган эди. Шунингдек, ишчилар етишмайдиган ҳудудларда хорижликларни тезроқ қонунийлаштириш кўзда тутилган. Бироқ, кейинчалик Макрон тарафдорлари кўпчилик бўлмаган Сенат ҳужжатнинг аксарият бандларини қатъийлаштирди. Масалан, Франция фуқаролигини олиш учун зарур бўлган мамлакатда яшаш муддатини беш йилдан ўн йилгача ошириш таклиф этилди.

Бу Франция ҳукуматининг қонун лойиҳасини қабул қилишга иккинчи уриниши. Бош вазир Элизабет Борн аллақачон конституциянинг 49.3-бандига мурожаат қилмоқчи эмаслигини айтди, у қонунни депутатлар розилигисиз қабул қилишга имкон беради. Бундай ҳолда, ҳукуматга ишончсизлик вотуми юзага келади, бу вазирлар маҳкамасининг обрўсига путур етказади. Эммануэл Макрон учун иммиграция қонунчилигини ислоҳ қилиш пенсия ислоҳотидан кейинги иккинчи йирик лойиҳадир.