Белград: сайловлардаги сохталаштиришга қарши акциялар давом этмоқда

Сербия пойтахти Белградда 25 декабр, душанба оқшомида мамлакатда бир ҳафта олдин ўтказилган парламент ва маҳаллий сайловларда сохталаштириш содир этилганига қарши намойишлар давом этди. AP хабарига кўра, юзлаб одамлар, асосан, талабалар давлат сайлов комиссияси биносига келган, сўнгра пойтахт марказий полиция бўлимига йўл олган, у ерда илгари қўлга олинган намойишчилар сақланмоқда.

Шунингдек, «Сербия зўравонликка қарши» мухолифат сиёсий коалициясининг юзлаб тарафдорлари Сербия ҳукумати бинолари ва хорижий элчихоналар жойлашган Кнез Милош марказий кўчасини тўсиб қўйишди. Гувоҳларнинг сўзларига кўра, полиция билан тўқнашувлар бўлмаган, талабалар йўлда футбол ва волейбол ўйнашган.

«Мен 2002 йилда туғилганман ва демократия учун курашиш учун ота-онам каби ҳеч қачон кўчага чиқмаслигим керак, деб ўйлагандим. Лекин мен мажбур бўлдим», — дея AFP намойишчилардан бири, 21 ёшли талаба Эмилия Миленковичнинг сўзларидан иқтибос келтирган.

Президент норозиликлар хориждан уюштирилганини даъво қилмоқда

Сербия полицияси маълумотларига кўра, намойишлар саккиз кундан бери тўхтамаяпти, камида 38 киши қўлга олинган. Улар конституциявий тузумни куч билан ўзгартириш ва ҳукуматни ағдаришга уриниш, шунингдек, зўравонлик ҳаракатларида айбланмоқда, деди 25 декабр куни Сербия полиция департаменти раҳбари Ивица Ивкович. Унинг сўзларига кўра, саккиз нафар полициячи жароҳатланган, улардан баъзилари оғир аҳволда. Намойишчилар, ўз навбатида, полицияни уларга нисбатан асоссиз зўравонлик қўллаганликда айбламоқда.

Шу куни Сербия президенти Александр Вучич бир кун аввал содир бўлган тартибсизликларни хориждан қўзғатилган Сербия ҳукуматини ағдаришга уриниш деб атади.

Сайловда Вучичнинг партияси ғалаба қозонди

Сербияда сайловлар 17 декабр куни бўлиб ўтди. Президент Вучичнинг ҳукмрон ўнг қанот популист Сербия прогрессив партияси (SNS) Халқ ассамблеясига (бир палатали парламент) сайловларда қарийб 47 фоиз овоз билан ғалаба қозонди. Мухолифатдаги «Зўравонликка қарши Сербия» 23 фоиз тўплаган.

Эртаси куни Европада хавфсизлик ва ҳамкорлик ташкилоти, Европа Иттифоқи парламенти ва Европа кенгаши вакилларидан иборат халқаро кузатувчилар миссияси сайлов участкаларида қатор қонунбузарликлар, хусусан, зўравонлик, овозларни сотиб олиш ва сохта сайлов бюллетенларини ташлаш ҳолатлари ҳақида хабар берди. Вучич сохталаштириш бўйича айбловларни рад этяпти. 

18 декабр куни кечқурун Белградда серб мухолифатининг минглаб тарафдорлари сохталаштиришларга қарши норозилик намойиши ўтказди. Социал-демократик эркинлик ва адолат партияси вице-президенти Мариника Тепич Белграддаги сайлов натижалари бекор қилинмагунча муддатсиз очлик эълон қилди. 

Намойишлар 24 декабр, якшанба кунигача тинч ўтди, ўшанда юзлаб намойишчилар пойтахт шаҳар маъмурияти биносига бостириб киришга уринган, уларнинг баъзилари бино ойналарини синдирган. Полиция намойишчиларга қарши кўздан ёш оқизувчи газ ишлатди, ўнлаб одамлар қўлга олинди.