Қозоғистон Оролни қутқариш халқаро фондига раҳбарлик қила бошлади 

Қозоғистон бу йилдан Оролни қутқариш халқаро фондига раҳбарлик қилади, деб хабар берди Tengrinews. 

Мамлакат раислиги уч йил давом этади ва Қосим-Жўмарт Тўқаев ҳам шу муддатга фонд президенти бўлади. 

Фонд Орол денгизини қутқариш ва умуман минтақадаги экологик вазиятни яхшилашга қаратилган дастурларни амалга оширади. Ташкилотга Қозоғистондан ташқари Туркманистон, Тожикистон ва Ўзбекистон киради. 

Қозоғистон сув хўжалиги ва ирригация вазири Нуржон Нуржигитовнинг маълум қилишича, Жаҳон банки билан биргаликда Шимолий Орол денгизини сақлаб қолиш лойиҳасининг иккинчи босқичини бошлаш режалаштирилган. Унинг сўзларига кўра, бу вазифани фондда иштирок этувчи барча мамлакатлар саъй-ҳаракатлари бирлашгандагина амалга ошириш мумкин.