Президентга спортдаги натижалар ва режалар бўйича ахборот берилди 

22 январ куни президент Шавкат Мирзиёевга спорт соҳасида эришилган натижалар ва халқаро мусобақаларга кўрилаётган тайёргарлик бўйича ахборот берилди. 

Қайд қилинишича, 2023 йилда «Беш ташаббус олимпиадаси» доирасидаги мусобақаларда 6 миллиондан ортиқ ёшлар қамраб олинди. Спорт инфратузилмаси яхши ривожланмаган, олис ва чекка ҳудудлардаги маҳаллаларда 449 та намунавий спорт майдончаси барпо этилди. 

Беш босқичли оммавий мусобақаларда қарийб 12 минг нафар иқтидорли ёшлар танлаб олиниб, спорт мактабларига йўналтирилди. Соҳадаги ҳар бир мактаб муайян спорт турларига ихтисослаштирилиб, янги инвентар ва анжомлар билан таъминланди.  

Профессионал спортчиларни халқаро мусобақаларга тайёрлаш бўйича ҳам зарур чоралар кўрилмоқда. Айни кунларда Жанубий Кореяда ўтаётган ўсмирлар ўртасида IV қишки олимпия ўйинларида тоғ чанғиси бўйича ўзбекистонлик спортчилар иштирок этмоқда. 

Бу йил Париж шаҳрида тўрт йилликнинг энг нуфузли мусобақаси – ёзги Олимпия ва Паралимпия ўйинлари бўлиб ўтади. Ҳозирга қадар атлетлар уларга, мос равишда, 17 та ва 34 та йўлланмани қўлга киритган.  

2025 йилда Тошкентда ўтказилиши режалаштирилган ёшлар ўртасида Осиё ва Параосиё ўйинларига ҳам тайёргарлик кўрилмоқда. Олимпия шаҳарчаси қурилиши жадал давом этмоқда. 

2024 йилда ижтимоий дастурлар доирасида 42 та спорт иншооти қуриш ва реконструкция қилиш режалаштирилган. «Беш ташаббус олимпиадаси» қамровини янада кенгайтирган ҳолда, иштирокчилар сонини 7 миллионга етказиш мўлжалланган. Спорт мактабларида қўшимча мингдан ортиқ гуруҳлар очиш кўзда тутилган. 

Давлат раҳбари спорт таълимини ривожлантириш, спортчиларни халқаро мусобақаларга тайёрлашда илғор ёндашувларни қўллаш бўйича кўрсатмалар берди.