Петербург портида божхона бир тоннадан ортиқ кокаинни мусодара қилди

Федерал божхона хизмати маълумотларига кўра, Антверпендан келган контейнердаги қаҳва қоплари орасида наркотик кукуни солинган тўртбурчаклар пакетлар бўлган.

Фото: German Custom/AP

Санкт-Петербургнинг «Большой» портида Белгиядан йирик кокаин контрабандаси аниқланди, деб хабар қилди Федерал божхона хизмати (ФТС) матбуот хизмати 24 январ, чоршанба куни. Гап 1200 кг наркотик ҳақида кетмоқда, унинг қора бозордаги нархи 13 миллиард рублдан ошади, дейилади департамент баёнотида.

Федерал божхона хизмати контрабандани, жумладан божхона назоратининг техник воситаларини қўллаш орқали аниқлаганини таъкидламоқда: «Божхона ходимлари Антверпендан (Белгия) келган контейнерни сканердан ўтказди ва қаҳва қоплари орасида оқ кукунли тўртбурчак шаклдаги брикетларни топди. Экспертиза унинг кокаин эканини тасдиқлади».

Кокаин топилгач, Болтиқбўйи божхонаси гиёҳванд моддаларни ўта йирик миқдорда контрабанда қилиш моддаси бўйича жиноий иш қўзғатди. Жиноят кодексининг ушбу моддасида умрбод озодликдан маҳрум қилиш жазоси назарда тутилган.

Бир ой ичида кокаиннинг иккинчи партияси

Бу - шу ойдаги иккинчи ана шундай ҳолат. 10 январ куни Федерал божхона хизмати Санкт-Петербургнинг «Большой» портида оғирлиги бир тоннадан ортиқ бўлган мингта кокаинли брикет топилгани ҳақида хабар берди. Улар Никарагуадан келган контейнер ичидан топилган. Партиянинг бир қисмига BBB, иккинчисига эса Dior белгиси қўйилган. Федерал божхона хизматининг маълум қилишича, мусодара қилинган кокаин партиясининг қора бозордаги қиймати 11 миллиард рублга баҳоланмоқда.

#кокаин #Петербург