Навоийда фуқаро «дом»га ўзи учун алоҳида лифт ўрнатмоқчи бўляпти

Қурилиш вазирлиги тегишли далолатнома расмийлаштирилиб, ҳужжатлар прокуратурага юборилганини билдирди.

Kun.uz’га Навоий шаҳри Навоий кўчасидаги 30 D уйнинг 10-қаватидаги хонадон эгаси «дом»нинг ташқи қисмидан уйига чиқиш учун алоҳида лифт ўрнатаётгани ҳақида маълумот келиб тушди.

Суратдан уйнинг ён томонига лифт учун темир конструкциялар тўлиқ ўрнатиб бўлинганини кўриш мумкин.

Айтишларича кўп қаватли уйнинг ўзи 9 қаватли. Бироқ 10-қаватда ҳам битта хонадон бор. Лифт ана шу хонадон учун алоҳида ўрнатилмоқда. Шу кўп қаватли уйда яшовчиларнинг эътирозига қарамасдан лифтни қуриш ишлари давом эттирилмоқда.

Kun.uz ушбу масаланинг уй-жой ҳамда шаҳарсозлик нормаларига мувофиқлигини аниқлаш мақсадида Қурилиш ва уй-жой коммунал хўжалиги вазирлигидан изоҳ олди. Вазирликка кўра, ҳолат юзасидан далолатнома қилиниб, ҳужжатлар прокуратурага юборилган. Далолатноманинг мазмуни ҳақида батафсил маълумот берилмади.