Тбилисидаги намойишларда кўздан ёш оқизувчи газ ишлатилди

Гуржистон пойтахти Тбилисида 16 апрел, сешанба куни Россиянинг «чет эл агентлари» тўғрисидаги қонунига ўхшаш бўлган «Хорижий таъсирнинг шаффофлиги тўғрисида»ги қонунга қарши оммавий норозилик намойишлари давом этди. DW мухбири хабар беришича, шу куни Руставели шоҳкўчасида 15 мингга яқин одам тўпланган. Баъзилар ўзлари билан Европа Иттифоқи байроқларини олиб келган.

Хавфсизлик кучлари акцияни тарқатишга уринди, махсус кучлар эса намойишчиларни парламент биносидан узоқлаштирди. Гуржистон Ички ишлар вазирлиги маълумотларига кўра, 16 апрел оқшомига қадар намойишда 11 киши қўлга олинган. Йиғилганлар жамоат тартибини бузган ва полицияга турли буюмлар, жумладан, шиша ва тошлар улоқтирган, дея таъкидлайди вазирлик матбуот хизмати. 

Намойишчиларнинг «ноқонуний хатти-ҳаракатлари» натижасида бир полициячи яраланиб, шифохонага етказилган», дейилади матбуот хабарида. Полиция машинаси ҳам шикастланган. «Ички ишлар вазирлиги жисмоний қарама-қаршиликка йўл қўймаслик учун махсус восита - қалампир гази деб аталувчи моддадан фойдаланган», - дея таъкидлайди департамент. 

Гуржистонда «Чет эл агентлари» тўғрисидаги қонун

Гуржистонда мунозарали «Хорижий таъсирнинг шаффофлиги тўғрисида»ги қонун Россиянинг «чет эл агентлари» тўғрисидаги қонунига ўхшашдир. Апрел ойи бошида ҳукмрон «Гуржистон орзуси» партияси бир йил аввал Тбилисида ўн минглаб одамлар иштирокидаги оммавий норозилик намойишларидан сўнг қайтариб олинган қонун лойиҳасининг ўзгартирилган вариантини яна овозга қўйиш ниятида эканлигини маълум қилган эди. 

Ҳужжатга кўра, маблағнинг камида 20 фоизини хориждан оладиган ташкилотлар тегишли органларда рўйхатдан ўтиши шарт. Агар қонуннинг дастлабки таҳририда бундай ташкилотлар «чет эл агентлари» деб таснифланган бўлса, ҳозирги лойиҳада гап «чет эл давлати манфаатларини ифодаловчи ташкилотлар» ҳақида кетмоқда.

DW мухбирига кўра, норозиликларга сабаб бўлган қонун бўйича овоз бериш гўёки кеч тугаган дебатлар туфайли 17 апрелга қолдирилди.