Аргентинада талабалар Милейнинг шок терапиясига қарши норозилик билдирди

Аргентина ҳукуматининг шок терапияси доирасида университет бюджетларини музлатиш ҳақидаги қарори оммавий норозиликларга сабаб бўлди. Мамлакатнинг энг йирик университети ёпилиши мумкин.

Фото: Rodrigo Abd/AP/picture alliance

23 апрел, сешанба куни юз минглаб аргентиналиклар, айниқса талабалар Буэнос-Айрес кўчаларига чиқиб, президент Хавер Милейнинг олий таълим секторидаги бюджетини қисқартирганига норозилик билдирди.

Милей ўтган декабрда ҳокимиятни қўлга киритганидан бери ўтказилган энг йирик намойишлардан бирида талабалар, ота-оналар, ўқитувчилар, университет ходимлари, шунингдек, касаба уюшмалари аъзолари ва мухолифат партиялари Аргентина пойтахти марказига тўпланиб, президент қароргоҳи томон юрган.

Милейнинг тежамкорлик чоралари

Талабалар норозилигига ҳукуматнинг 2024 ўқув йили учун инфляция даражаси 288 фоизга етганига қарамай, университетлар бюджетини оширмаслик ҳақидаги қарори сабаб бўлди. Милей лавозимга киришгандан сўнг эълон қилган Аргентина учун «шок терапияси» доирасида университет бюджетларини музлатишга қарор қилинди. Бу, биринчи навбатда, давлат харажатларини сезиларли даражада қисқартиришни назарда тутади. Шу йўл билан янги президент инфляцияни жиловлашга умид қилмоқда. Ушбу чора-тадбирлар туфайли мамлакатда 16 йил ичида биринчи марта бюджет профицити қайд этилди, аммо иқтисодчилар унинг барқарор бўлишига шубҳа қилмоқда.

Буэнос-Айрес бепул университетининг баъзи факултетлари аллақачон харажатларни тежаш бўйича фавқулодда чора-тадбирларни, жумладан, умумий жойларда ёритишни камайтириш, лифтлардан фойдаланишни чеклаш ва кутубхонанинг иш вақтини қисқартиришни жорий қилган. Лотин Америкасидаги энг йирик университет тежамкорлик чоралари туфайли ёпилиши мумкин.