Синоптиклар июн ойида кутилаётган об-ҳаво тўғрисида маълумот берди

“Ўзгидромет” Ўзбекистонда бу йилнинг июн ойида об-ҳаво қандай бўлиши тўғрисида маълумот тақдим этди.

Фото: Kun.uz

Бу йил ёз илиқ об-ҳаво билан бошланади. Ҳарорат кундуз кунлари +28...+33 даража атрофида, жанубда ва чўл ҳудудларда +35...+38 даражагача бўлади, бу ўртача кўп йиллик қийматларга яқиндир.

Июн ойининг биринчи беш кунлигида Ўзбекистон бўйича асосан ёғингарчиликсиз об-ҳаво бўлиши кутилмоқда, фақат айрим тоғолди ва тоғли ҳудудларда 4-5 июн кунлари қисқа муддатли ёмғир ёғиши, момақалдироқ бўлиши мумкин. Ҳарорат кечалари +14...+19 даража, кундуз кунлари +28...+33 даража, баъзи жойларда +35 даражагача, жанубда ва чўл ҳудудларда +37 даражагача бўлади.

6-10 июнда айрим кунларда (1-2 кун) баъзи жойларда қисқа муддатли ёмғир ёғиши, момақалдироқ бўлиши мумкин. Ҳарорат кечалари +14...+19 даража, кундуз кунлари +28...+33 даража, шимолда ва чўл ҳудудларда +35...+37 даражагача бўлади.

Иккинчи ва учинчи ўн кунликларда ҳарорат асосан кечалари +15...+20 даража, кундуз кунлари +33...+38 даража, жанубда ва чўл ҳудудларда +40 даражагача бўлади. Ойнинг иккинчи ўн кунлигида қисқа муддатли ёмғирлар ёғиши эҳтимоли кўп.