Аҳмадинажод Эрон президенти сайловида иштирок этиш учун рўйхатдан ўтди

Эроннинг собиқ президенти Маҳмуд Аҳмадинажод навбатдан ташқари президентлик сайловида иштирок этиш учун рўйхатдан ўтди, деб ёзди AP. 

Умуман олганда, сайловда иштирок этиш учун 80 нафардан ортиқ номзоддан ариза қабул қилинган. 

Рўйхатдан ўтишнинг ўзи сайловда қатнашиш ҳуқуқини бермайди. Аввало, Эрон Конституциясининг Қўриқчилар кенгаши сайловда иштирок этадиган номзодлар рўйхатини расман тасдиқлаши керак. 

Аҳмадинажод 2005-2013 йилларда Эрон президенти бўлган. 2017 ва 2021 йилги президентлик сайловида ҳам рўйхатдан ўтган, бироқ Қўриқчилар кенгаши томонидан иштирок этишга рухсат берилмаган эди. 

Янги президентлик сайлови Эрон Конституциясининг 131-моддасига кўра, президент вафот этган ёки муомалага лаёқатсиз деб эълон қилинган ва унинг вазифалари биринчи вице-президентга ўтганидан кейин 50 кун ичида бўлиб ўтиши керак. Ҳозир бу лавозимни Муҳаммад Мухбир эгаллаб турибди. Таъкидланишича, у президентлик сайловида иштирок этмасликка қарор қилган. 

Тасдиқланган сайлов тақвимига кўра, номзодларни рўйхатга олиш 30 майдан 3 июнга қадар ўтказилди. Энди номзодларнинг белгиланган талабларга мувофиқлигини текшириш 4 июндан 10 июнга қадар амалга оширилади. Номзодларнинг якуний рўйхати 11 июн куни эълон қилинади. 

Сайловолди ташвиқоти икки ҳафта давомида – 12 июндан 26 июнгача давом этади. Сайловга бир кун қолганида «жимлик куни» эълон қилинади, бу вақтда сайловолди ташвиқоти олиб бориш тақиқланади. Президентлик сайлови 28 июн куни бўлиб ўтади. Иккинчи тур, агар зарурат туғилса, 5 июл кунига белгиланади.